Թրամփը պատրաստ է համաձայնության գալ Իրանի հետ՝ միջուկային զենք մշակելու կարողությունից երկրի հրաժարվելու դեպքում. Քուշներ
2 րոպեի ընթերցում
ԱՄՆ նախագահ Դոնալդ Թրամփը պատրաստ է համաձայնության գալ Իրանի հետ, եթե Թեհրանը հրաժարվի միջուկային զենք մշակելու իր կարողությունից, սակայն մինչ այժմ իրանցիները հետաքրքրություն չեն ցուցաբերել Վաշինգտոնի համար ընդունելի պայմանների նկատմամբ։
«Արմենպրես»-ի փոխանցմամբ՝ այս մասին Fox News-ի հետ հարցազրույցում հայտարարել է ԱՄՆ նախագահի խորհրդական և փեսա Ջարեդ Քուշները, որը Մերձավոր Արևելք այցի ընթացքում հանդիպել է ՀԱՄԱՍ-ի ղեկավարության և Իսրայելի վարչապետ Բենիամին Նեթանյահուի հետ։
«Եթե Իրանը պատրաստ է ավարտին հասցնել մեզ հետ քննարկված գործարքը և հրաժարվել միջուկային զենք մշակելու իր կարողությունից, ապա ակնհայտ է, որ նա (խմբ.՝ ԱՄՆ նախագահը) պատրաստ է համաձայնության գալ, որը կարող է հիանալի լինել Իրանի ժողովրդի համար։ Սակայն այս պահին նրանք որևէ հետաքրքրություն չեն ցուցաբերում մեր կողմից խելամիտ համարվող որևէ բան անելու հարցում», - ասել է Քուշները։
Նրա խոսքով՝ նախագահ Թրամփը շատ կենտրոնացած է տնտեսական ճնշման վրա։
«Նա իսկապես լուրջ է վերաբերվում շրջափակմանը։ Եթե նայեք Իրանի տնտեսությանը, այն շատ ավելի վատ վիճակում է», - նշել է նա։
Քուշների խոսքով՝ Թրամփը չի ցանկանում շտապել գործարքի հարցում։
«Նա կկնքի ճիշտ գործարքը, երբ այն պատրաստ լինի։ Բայց մենք շատ դրական և ակտիվ զրույցներ ենք ունենում, և տեսնենք, թե ինչ տեղի կունենա», - ասել է նա։