Հնդկաստանի ԱԳՆ-ն կանչել է Ուկրաինայի դեսպանին՝ Սև ծովում հարվածներից հնդիկ նավաստու զոհվելու կապակցությամբ

Հնդկաստանի արտաքին գործերի նախարարությունը կանչել է հանրապետությունում Ուկրաինայի դեսպան Ալեքսանդր Պոլիշչուկին՝ Սև ծովում նավին Ուկրաինայի զինված ուժերի հարվածի պատճառով հնդիկ նավաստու զոհվելուց հետո: Գերատեսչությունն անհանգստություն է հայտնել առևտրային նավերի վրա հարձակումների կապակցությամբ։ «Արմենպրես»-ի փոխանցմամբ՝ այս մասին ասվում է Հնդկաստանի ԱԳՆ հաղորդագրության մեջ։

Նշվում է, որ դիվանագետը կանչվել է MV OMORFI առևտրային նավի վրա հարձակման կապակցությամբ, որը հանգեցրել է «Հնդկաստանի քաղաքացու ողբերգական մահվան»։

«Նախարարությունը լուրջ անհանգստություն է հայտնել այդ միջադեպի կապակցությամբ և ամենավճռական կերպով դատապարտել է նման հարձակումներն առևտրային նավերի վրա՝ ընդգծելով դրանց բացասական ազդեցությունը ծովագնացության անվտանգության, նավարկության ազատության և միջազգային առևտրի վրա», - նշվում է հայտարարության մեջ։

«Դեսպանին խնդրել են Ուկրաինայի իշխանություններին ի գիտություն հայտնել Հնդկաստանի լուրջ անհանգստությունն առևտրային նավերի վրա հարձակումների կապակցությամբ և կրկին ընդգծել են, որ նման գործողությունները, որոնք սպառնում են անմեղ քաղաքացիական ծովայինների կյանքին, անընդունելի են և պետք է բացառվեն», - նշել են Արտաքին գործերի նախարարությունում։

Հուլիսի 25-ին Հնդկաստանի արտգործնախարարությունը հայտարարել էր, որ MV OMORFI առևտրային նավը հարձակման է ենթարկվել Սև ծովով անցնելիս՝ Ռուսաստանի տարածքային ջրերում։ Հնդկաստանի մեկ քաղաքացի զոհվել է։ Անձնակազմի ևս երկու հնդիկ անդամները չեն տուժել։

Անցյալ շաբաթ Հնդկաստանի ԱԳՆ-ն կանչել էր Ռուսաստանի գործերի ժամանակավոր հավատարմատար Վլադիմիր Լադանովին Օդեսայի ափերի մոտ MV Golden Leo նավի վրա հարձակման հետևանքով չորս հնդիկ նավաստու զոհվելու կապակցությամբ։