2 րոպեի ընթերցում
Գեղարքունիքի մարզի Վարդենիս համայնքի Կախակն գյուղում սուբվենցիոն և պետական ծրագրերի շրջանակներում 2018-2025 թվականների ընթացքում սոցիալ-տնտեսական և կենսական նշանակության 7 ծրագիր է իրականացվել, որոնց ուղղությամբ կատարված կապիտալ ներդրումները կազմել են 1 միլիարդ 344 միլիոն 938 հազար դրամ։
«Արմենպրես»-ի թղթակցին Վարդենիսի համայնքապետարանից տեղեկացրին, որ իրականացված ծրագրերից 5-ը սուբվենցիոն են՝ 77 միլիոն 398 հազար դրամ ընդհանուր արժեքով, 2-ը՝ պետական՝ 1 միլիարդ 227 միլիոն 540 հազար դրամ արժեքով։
Իրականացված ծրագրերի արդյունքում Կախակնում 2018-2025 թվականների ընթացքում կառուցվել է 3300 մետր խմելու, 1500 մետր ոռոգման ներքին ու արտաքին ջրատար ցանցեր, 2000 մետր արտաքին լուսավորության ցանց, հիմնանորոգվել է ներհամայնքային նշանակության 327 գծամետր ճանապարհ, ընթացքի մեջ է արդի չափորոշիչներին համապատասխան 144 տեղանոց կրթահամալիրի կառուցումը։
Կախակնի կրթահամալիրը կառուցվում է ՀՀ կառավարության կողմից իրականացվող «300 դպրոց, 500 մանկապարտեզ» ծրագրի շրջանակներում և Հայաստանի տարածքային զարգացման հիմնադրամի պատվիրատվությամբ՝ պետբյուջեի միջոցներով, 1 միլիարդ 251 միլիոն 258 հազար դրամ պայմանագրային արժեքով։ Կրթահամալիրի կազմում կլինի նաև 80 տեղանոց մանկապարտեզի շենքը։
Շինարարական աշխատանքները, որոնք արդեն իրականացվել են շուրջ 95 տոկոսով, մեկնարկել են 2024 թվականի դեկտեմբերից և կավարտվեն 2026-ի սեպտեմբերին։