1 րոպեի ընթերցում
Չիլիում ձյան առատ տեղումների և փոթորկաբեր քամու պատճառով 13 մարդ է զոհվել, ավելի քան 1400 մարդ գտնվում է ապաստարաններում: «Արմենպրես»-ի փոխանցմամբ՝ այս մասին մամուլի ասուլիսում հայտնել է հարավամերիկյան երկրի Տարերային աղետների դեմ պայքարի ազգային ծառայության տնօրեն Ալիսիա Սեբրիանը։
«Ցավոք, արդեն հայտնի է 13 մարդու մահվան մասին: Յոթ մարդ անհետ կորած է», - նրա խոսքերն է մեջբերում ՏԱՍՍ գործակալությունը։
Ժամանակավոր ապաստարանի կարիք ունեցող չիլիացիների թիվը հասել է 1412-ի:
«63 005 մարդ մնում է կտրված արտաքին աշխարհից, հիմնականում՝ Ատակամայի և Կոկիմբոյի տարածաշրջաններում», - ասել է Սեբրիանը:
Ավելի վաղ այդ թիվը հասնում էր 104 504-ի։
Վերջին տվյալների համաձայն՝ վնասվել է ավելի քան 22 000 տուն, ավերվել է 81 բնակելի շենք: 87 000 բաժանորդ մնացել է առանց էլեկտրաէներգիայի, ավելի քան 180 000-ն՝ առանց ջրամատակարարման։
Ըստ օդերևութաբանների կանխատեսումների՝ առաջիկա օրերին տեղումները կնվազեն։
Ավելի վաղ Կոկիմբոյի տարածաշրջանում և Ատակամայի տարածաշրջանի Ուասկոյի նահանգում արտակարգ դրություն է հայտարարվել՝ մթնոլորտային ճակատի անցման պատճառով։ Տարերքը մոլեգնել է նաև Չիլիի մյուս տարածաշրջաններում՝ երկրի հյուսիսից մինչև Արաուկանա: