1 րոպեի ընթերցում
Կոնգոյի Հանրային առողջապահության ինստիտուտն իր վերջին զեկույցում հայտնել է, որ Կոնգոյի Դեմոկրատական Հանրապետությունում էբոլա վիրուսը տարածվել է ևս երկու՝ հյուսիսարևելյան Վերին Ուելե և Չոպո նահանգներում։ «Արմենպրես»-ի փոխանցմամբ՝ այս մասին հայտնում է Reuters-ը։
«Չնայած ընթացիկ հետազոտությունները ցույց են տալիս, որ այս երկու նահանգներում հայտնաբերված բոլոր դեպքերը հիմնականում ներմուծվել են Իտուրիի նահանգից, անհրաժեշտ է այս երկու նահանգները դիտարկել որպես համաճարակային գոտի», - ասվում է զեկույցում:
Հուլիսի 12-ի տվյալներով՝ երկրում էբոլայի հաստատված դեպքերի թիվը հասել է 1926-ի, 702-ը՝ մահվան ելքով։
Կոնգոյում էբոլայի բռնկում է հայտարարվել մայիսի 15-ին, հիմնական էպիկենտրոնը Իտուրի նահանգն է, դեպքեր են գրանցվել նաև Հյուսիսային Կիվու և Հարավային Կիվու նահանգներում։
Հաճախ մահացու վիրուսային հիվանդությունը տարածվում է վարակված մարդկանց կամ կենդանիների օրգանիզմների հեղուկների հետ անմիջական շփման միջոցով։ Այն կարող է դրսևորվել բարձր ջերմությամբ, փսխումով, ներքին ու արտաքին արյունահոսությամբ։