Սևան համայնքում «ԵՄ Կայուն էներգիա-2026» միջոցառումների ծրագիրը վերջնագիծը հատել է մրցանակաբաշխությամբ
4 րոպեի ընթերցում
Գեղարքունիքի մարզի Սևան համայնքում 2026 թվականի ապրիլ-հունիս ամիսներին, «ԵՄ Կայուն էներգիա-2026» ծրագրի շրջանակներում, որն այս տարի կրում էր «Մաքուր, անվտանգ և մրցունակ էներգետիկ միություն» խորագիրը, տեղի են ունեցել երեք տասնյակից ավելի միջոցառումներ, նախաձեռնություններ, մրցույթներ:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, հուլիսի 8-ին Սևան քաղաքի Բիզնես կենտրոնում տեղի է ունեցել «ԵՄ Կայուն էներգիա-2026»-ի շրջանակներում անցկացված մրցույթների մրցանակաբաշխությունը և ամփոփիչ միջոցառում, որին ներկա են եղել «Քաղաքապետերի դաշնագիր արևելք» ծրագրի տարածաշրջանային աշխատանքային խմբի գործող ղեկավար Քրիստոֆ Ֆրերինգը, «Քաղաքապետերի դաշնագիր արևելք» ծրագրի տարածաշրջանային աշխատանքային խմբի նոր ղեկավար Իան Տյորները, «Քաղաքապետերի դաշնագիր՝ Արևելք» ծրագրի ազգային փորձագետ Արտեմ Խարազյանը, հաղորդակցության գծով փորձագետ Տաթևիկ Հարությունյանը։
Մրցույթների մասնակից դպրոցները, կազմակերպությունները և անհատներն իրենց աշխատանքները և պատրաստած նյութերը ներկայացրել են Սևանի համայնքապետարան, որտեղ հանձնաժողովի կողմից և հավանումների արդյունքում ընտրվել են լավագույն աշխատանքները յոթ անվանակարգերում։
Լավագույն աշխատանքների հեղինակները ստացել են մրցանակներ, հավաստագրեր, ակտիվ մասնակցություն ունեցած կազմակերպությունները, հաստատությունները, անհատները խրախուսվել են շնորհակալագրերով, պատվոգրերով, հուշանվերներով:
Սևան համայնքի ղեկավար Սարգիս Մուրադյանի կողմից շնորհված պատվոգրերը, շնորհակալագրերն ու նվերները հանձնել է Սևանի համայնքապետարանի աշխատակազմնի քարտուղար Արմենուհի Ղուկասյանը։
Ամփոփիչ միջոցառման ընթացքում անդրադարձ է կատարվել այս տարի անցկացված միջոցառումներին, մրցույթներին և նախաձեռնություններին, նշվել նաև այն նորամուծությունները, որոնք նոր շունչ և թարմություն են հաղորդել անցկացված միջոցառումներին:
Սևան համայնքի ղեկավարի պատվոգրին են արժանացել «Քաղաքապետերի դաշնագիր՝ Արևելք» ծրագրի ազգային փորձագետ Արտեմ Խարազյանը, հաղորդակցության գծով փորձագետ Տաթևիկ Հարությունյանը:
Համայնքի կողմից խորհրդանշական հուշանվերներ են ստացել «Քաղաքապետերի դաշնագիր արևելք» ծրագրի տարածաշրջանային աշխատանքային խմբի գործող ղեկավար Քրիստոֆ Ֆրերինգը, «Քաղաքապետերի դաշնագիր արևելք» ծրագրի տարածաշրջանային աշխատանքային խմբի նոր ղեկավար Իան Տյորները:
«Այս տարի Սևան համայնքը ներկայացավ աննախադեպ թվով միջոցառումներով և նախաձեռնություններով, որի մասին նշեցին նաև «Քաղաքապետերի դաշնագիր արևելք» ծրագրի ներկայացուցիչները, միաժամանակ հայտնեցին, որ շուտով տեղի է ունենալու ազգային մրցանակաբաշխություն,որին ներկայացվել են Սևան համայնքի կողմից տարբեր անվանակարգերում լավագույնը ճանաչված աշխատանքները»,-ներկայացրին Սևանի համայնքապետարանի աշխատակազմից։