3 րոպեի ընթերցում
Ուկրաինայի նախագահ Վոլոդիմիր Զելենսկին Անկարայում ՆԱՏՕ-ի գագաթնաժողովի շրջանակում անցկացված Պաշտպանական արդյունաբերության ֆորումում իր ելույթում ներկայացրել է Ուկրաինայի հաջողությունները Ռուսաստանի դեմ պատերազմի ժամանակ, մասնավորապես՝ անօդաչու թռչող սարքերի արդյունաբերության ոլորտում։ Նա կոչ է արել, որ Ուկրաինան դառնա ՆԱՏՕ-ի անդամ։ «Արմենպրես»-ի փոխանցմամբ՝ այս մասին հաղորդում է BBC-ի ռուսական ծառայությունը։
Զելենսկու խոսքով՝ ուկրաինական ՀՕՊ համակարգերը խոցում են Shahed անօդաչու թռչող սարքերի ավելի քան 90%-ը, ինչն աշխարհում լավագույն արդյունքն է։
«Դուք իսկապե՞ս կարծում եք, որ նման պաշտպանական կարողություններ ունեցող երկիրը պետք է լինի դաշինքից դուրս», - նշել է Զելենսկին՝ դիմելով լսարանին, որի կազմում էին նաև Եվրահանձնաժողովի նախագահ Ուրսուլա ֆոն դեր Լայենը և ՆԱՏՕ-ի գլխավոր քարտուղար Մարկ Ռյուտեն։
«Ուկրաինայի անդամակցությունը ՆԱՏՕ-ին արտակարգ պաշտպանական կարողությունների աղբյուր է», - հավելել է Ուկրաինայի նախագահը։
Նա նշել է, որ ՆԱՏՕ-ն Ուկրաինայի հետ միասին ապագայի դաշինք է։
Զելենսկին նաև անդրադարձել է Ռուսաստանի վրա հեռահար հարվածներին, որոնք հասել են մինչև Օմսկ։ Նրա խոսքով՝ Սիբիրում նավթավերամշակման գործարանի վրա հարձակումը բացառություն չէր, այլ իրականություն։ Զելենսկին հավելել է, որ Ռուսաստանում չի մնացել ոչ մի խոշոր նավթավերամշակման գործարան, որը չի ենթարկվել Ուկրաինայի զինված ուժերի հարձակմանը։
Նա հիշատակել է նաև անօդաչու թռչող սարքերի մասին համաձայնագիրը (Drone deal), որի համաձայն Ուկրաինայի գործընկերները`ԵՄ-ի և ՆԱՏՕ-ի երկրները, ինչպես նաև Ադրբեջանը և Պարսից ծոցի երկրները, կարող են ստանալ ուկրաինական անօդաչու թռչող սարքեր։
Միևնույն ժամանակ Զելենսկին շեշտել է, որ Ռուսաստանը դեռևս ունի մեկ կարևոր առավելություն՝ բալիստիկան։
«Մինչ այս պատերազմը շարունակվում է, խնդրում եմ, որ օգնեք մեզ ՀՕՊ հրթիռներով։ Դա է մեր առաջնահերթությունը։ Մնացածը մենք կարող ենք ինքնուրույն անել», - ասել է Զելենսկին։
Նրա խոսքով՝ Եվրոպան պետք է կառուցի ուժեղ պաշտպանություն ռուսական հրթիռներից, Եվրոպան կարիք ունի իր սեփական ՀՕՊ համակարգերի, որոնք կարող են զանգվածաբար արտադրվել և պաշտպանել ռուսական հարվածներից։