2 րոպեի ընթերցում
Ուկրաինայի նախագահ Վոլոդիմիր Զելենսկին ժամանել է Թուրքիայի մայրաքաղաք Անկարա՝ մասնակցելու ՆԱՏՕ-ի 36-րդ գագաթնաժողովին։
Ինչպես հաղորդում է «Արմենպրես»-ը, այս մասին հայտնում է «Անադոլու» լրատվական գործակալությունը։
Զելենսկիի ինքնաթիռը վայրէջք է կատարել Անկարայի «Էսենբողա» օդանավակայանում, որտեղ նրան դիմավորել են Թուրքիայի մշակույթի և զբոսաշրջության նախարար Մեհմեթ Նուրի Էրսոյը և այլ պաշտոնատար անձինք։
Ուկրաինայի նախագահը հայտարարել է, որ Կիևը ՆԱՏՕ-ի գագաթնաժողովից ակնկալում է ուժեղ և արդյունավետ որոշումներ՝ ընդգծելով, որ առաջնահերթությունը երկրի պաշտպանունակության ամրապնդումն է։
«Մեզ կարևոր աշխատանք է սպասվում Անկարայում։ Մենք ակնկալում ենք ՆԱՏՕ-ի ուժեղ և արդյունավետ գագաթնաժողով։ Այժմ անհրաժեշտ են որոշումներ, որոնք մեր քաղաքացիներին կապահովեն ավելի մեծ պաշտպանությամբ, կուժեղացնեն մեր պաշտպանական հնարավորությունները և ավելի սերտ կդարձնեն անվտանգության ոլորտում Ուկրաինայի, Եվրոպայի և Ամերիկայի համագործակցությունը»,- գրել է Զելենսկին «Տելեգրամ»-ի իր ալիքում։
Նրա խոսքով՝ գագաթնաժողովի շրջանակում նախատեսված են պաշտպանական համագործակցության զարգացմանն ուղղված միջոցառումներ, ինչպես նաև երկկողմ հանդիպումներ գործընկեր երկրների ղեկավարների հետ։
«ՆԱՏՕ-ի պաշտպանական արդյունաբերության ֆորումը, գրեթե երկու տասնյակ երկկողմ հանդիպումները, անօդաչու թռչող սարքերի վերաբերյալ նոր համաձայնագրերը և գործընկերների հետ այլ պայմանավորվածություններն ընդգրկված են օրակարգում»,- նշել է Ուկրաինայի նախագահը։
Զելենսկին նաև ընդգծել է, որ Ուկրաինան շարունակելու է աշխատել հակաօդային պաշտպանության համակարգի ամրապնդման ուղղությամբ։
«Նոր համակարգերը, դրանց համար նախատեսված հրթիռները, արտադրության լիցենզավորման հարցերը մեր առաջնահերթություններից են։ Մենք շարունակելու ենք հետևողականորեն աշխատել Ուկրաինայի հակաօդային պաշտպանության կարողությունների ընդլայնման ուղղությամբ»,- հայտարարել է նա։