2 րոպեի ընթերցում
«Բարգավաճ Հայաստան» կուսակցության նախագահ, գործարար Գագիկ Ծառուկյանի առանձնատանը պահվող առյուծները տեղափոխվել են Երևանի կենդանաբանական այգի։
«Արմենպրես»-ի փոխանցմամբ՝ այս մասին հայտնել է «Բարգավաճ Հայաստան» կուսակցության մամուլի խոսնակ Իվետա Տոնոյանը։
Նա նշել է, որ Ծառուկյանի ընդունելությունների տանը կատարված խուզարկությունների ընթացքում քնեցվել և կենդանաբանական այգի տեղափոխվել նաև այնտեղ պահվող կենդանիները, որոնք, ըստ խոսնակի, ունեցել են պահման լավագույն պայմանները: Կենդանիները քնեցվել են Բնապահպանության տեսչական մարմնի աշխատակիցների կողմից:
Երևանի քաղաքապետարանը ևս թեմայի վերաբերյալ հաղորդագրություն է տարածել՝ հայտնելով, որ քննչական գործողությունների ընթացքում Երևանի քաղաքապետարանի առաջարկով մասնավոր առանձնատանը պահվող կենդանիները տեղափոխվել են Երևանի կենդանաբանական այգի։
Նշվել է, որ կենդանիները կգտնվեն մասնագետների հսկողության և խնամքի ներքո:
Քաղաքապետարանը նաև տեսանյութ է տարածել, որից երևում է, որ տեղափոխվող կենդանիներն առյուծներ են։
Իրավապահ մարմինները հուլիսի 6-ի վաղ առավոտից խուզարկություններ էին սկսել Գագիկ Ծառուկյանի առանձնատանը և նրան պատկանող շուրջ 70 հասցեներում։ Ավելի ուշ Քննչական կոմիտեն հայտնեց, որ Գագիկ Ծառուկյանը ձերբակալվել է առանձնապես խոշոր չափերով խարդախություն և փողերի լվացում կատարելու մեղադրանքով։