2 րոպեի ընթերցում
16 երկրից մոտ 1000 փրկարար է ուղարկվել Վենեսուելա՝ ավերիչ երկրաշարժերի հետևանքների վերացման համար։ «Արմենպրես»-ի փոխանցմամբ՝ այս մասին հայտարարել է ՄԱԿ-ի Հումանիտար հարցերի համակարգման վարչության պաշտոնական ներկայացուցիչ Յենս Լարկեն Ժնևում կայացած մամուլի ասուլիսում։
Նրա խոսքով՝ ներկա պահին մարդասիրական կազմակերպություններն «օպերատիվ և լայն մասշտաբներով» Վենեսուելայում արձագանքում են տարերային աղետին՝ աջակցություն ցույց տալով կառավարությանը։ Լարկեն նշել է, որ առաջնահերթություն են մնում որոնողափրկարարական աշխատանքները և բժշկական օգնությունն աղետի վնասած շրջաններում։
«Ընդհանուր առմամբ, ամբողջ աշխարհից գործի է դրված 25 խումբ՝ ինչպես որոնողափրկարարական, այնպես էլ բժշկական, որոնք բաղկացած են 1000 հոգուց, և նրանց թիվը կաճի», - Լարկեի խոսքերն է մեջբերում ՏԱՍՍ-ը։
Լարկեն պարզաբանել է, որ որոնողափրկարարական խմբեր են ուղարկել Մեծ Բրիտանիան, Գերմանիան, Հորդանանը, Իսպանիան, Իտալիան, Կատարը, Կոլումբիան, Նիդեռլանդները, ԱՄՆ-ն, Ֆրանսիան, Չեխիան, Չիլին, Շվեյցարիան և Էկվադորը։ Նա հավելել է, որ շուտով նաև դեպքի վայր կժամանի լրացուցիչ օգնություն Մեքսիկայից և Սալվադորից։
Հունիսի 24-ի երեկոյան Վենեսուելայում 7,2 և 7,5 մագնիտուդով մի շարք երկրաշարժերի հետևանքով, վերջին տվյալներով, զոհվել է 589 մարդ, հազարավոր մարդիկ վիրավորվել են։ Ավերվել են տասնյակ շենքեր։ Երկրի իշխանությունները սահմանել են արտակարգ դրություն, իսկ Լա Գուայրայի ափամերձ նահանգը հայտարարվել է աղետի գոտի: