ՀՀ ԱԳ նախարարի տեղակալը վերահաստատել է Հայաստանի պատրաստակամությունը՝ շարունակելու կառուցողական համագործակցությունը ՅՈՒՆԵՍԿՕ-ի հետ
2 րոպեի ընթերցում
Հայաստանի Հանրապետության արտաքին գործերի նախարարի տեղակալ Ռոբերտ Աբիսողոմոնյանը Փարիզում հանդիպել է ՅՈՒՆԵՍԿՕ-ի Գլխավոր տնօրենի աշխատակազմի ղեկավար Դով Լինչի հետ:
Ինչպես «Արմենպրես»-ը տեղեկանում է ՀՀ ԱԳ նախարարության տարածած հաղորդագրությունից, Ռոբերտ Աբիսողոմոնյանը վերահաստատել է Հայաստանի պատրաստակամությունը՝ շարունակելու կառուցողական համագործակցությունը ՅՈՒՆԵՍԿՕ-ի հետ:
Մտքեր են փոխանակվել այս տարի Երևանում կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովի շրջանակներում ՅՈՒՆԵՍԿՕ-ի հետ համատեղ նախաձեռնությունների իրականացման և համագործակցության հեռանկարների վերաբերյալ: Այս համատեքստում կարևորվել է թեմատիկ միջոցառումներին, մասնավորապես` «Կրթության օր» թեմատիկ օրվան, ՅՈւՆԵՍԿՕ-ի ակտիվ ներգրավվածությունը, ինչպես նաև կենսաբազմազանության կրթության վերաբերյալ Գլոբալ գործողությունների ծրագրի ընդունումը և մեկնարկը:
ՀՀ ԱԳ նախարարի տեղակալը ներկայացրել է COP17-ի շրջանակներում նախատեսված Առաջնորդների գագաթնաժողովին և Բարձրաստիճան նախարարական հատվածին բարձր մակարդակի մասնակցության կարևորությունը:
ԱԳ նախարարի տեղակալ Ռոբերտ Աբիսողոմոնյանն ընդգծել է Հայաստանի շարունակական աջակցությունը կրթությանն ու խաղաղությանն ուղղված ՅՈՒՆԵՍԿՕ-ի ջանքերին` այս համատեքստում ներկայացնելով Հայաստանի նախաձեռնությամբ ՄԱԿ ԳԱ կողմից միաձայն ընդունված «Կրթություն հանուն խաղաղության» բանաձևը: