Լեհաստանի նախագահ Կարոլ Նավրոցկին պաշտոնական այց կկատարի Թուրքիա

Լեհաստանի նախագահ Կարոլ Նավրոցկին Թուրքիայի նախագահ Ռեջեփ Թայիփ Էրդողանի հրավերով հունիսի 23-24-ը պաշտոնական այցով կգտնվի Թուրքիայում։

Ինչպես հաղորդում է «Արմենպրես»-ը, այս մասին հայտնում է թուրքական «Անադոլու» լրատվական գործակալությունը:   

Թուրքիայի նախագահի աշխատակազմի հաղորդակցության վարչության ղեկավար Բուրհանեթթին Դուրանի  խոսքով՝ այցի շրջանակում նախատեսված հանդիպումների ընթացքում կքննարկվեն թուրք-լեհական հարաբերությունների բոլոր հիմնական ուղղությունները, ինչպես նաև գործող համագործակցության հետագա զարգացման հնարավորությունները։ 

Սպասվում է, որ կողմերը երկկողմ օրակարգից բացի մտքեր կփոխանակեն նաև տարածաշրջանային և միջազգային արդիական հարցերի շուրջ։