3 րոպեի ընթերցում
Հայաստանում նախատեսվում է ներդնել բանկերի վերակառուցման ինստիտուտ։ Բանկերին վերակառուցելու բացառիկ իրավասությունը կվերապահվի Կենտրոնական բանկին։
«Արմենպրես»-ի հաղորդմամբ՝ Ազգային ժողովը հունիսի 18-ի նիստում առաջին ընթերցմամբ քննարկել է «Բանկերի վերակառուցման մասին» օրենքի նախագիծը՝ կից օրենսդրական փաթեթով։ Նախագիծը ներկայացրել է Կենտրոնական բանկի նախագահի տեղակալ Արմեն Նուրբեկյանը։
Նախագծով սահմանվում են Հայաստանի տարածքում գործող բանկերի և օտարերկրյա բանկերի մասնաճյուղերի վերակառուցման կարգն ու պայմանները։
Նուրբեկյանի խոսքով՝ գործող կարգավորումներով, եթե ֆինանսական ինստիտուտը կանգնում է ֆինանսական խնդրի առաջ, կայունացման միակ գործնական լուծումը դրա լուծարումն է։ Նոր օրենքի նպատակն է այդ մոտեցումը փոխել և ճգնաժամային իրավիճակում հայտնված ֆինանսական ինստիտուտը վերակառուցելու հնարավորություն ստեղծել։
«Բանկերի վերակառուցման մասին» օրենքի նախագիծը նպատակ ունի փոխել գործող կարգավորումները՝ վերակառուցելով ճգնաժամային խնդրի առաջ կանգնած ֆինանսական ինստիտուտը»,-նշել է Նուրբեկյանը։
Օրենսդրական փաթեթի ընդունման անհրաժեշտությունը բխում է Համաշխարհային բանկի և Արժույթի միջազգային հիմնադրամի կողմից դեռևս 2018 թվականին Ֆինանսական համակարգի գնահատման ծրագրի շրջանակում ներկայացված առաջարկներից։
Նախագծի նպատակն է ներդնել ճգնաժամերի կառավարման արդյունավետ և միջազգային չափանիշներին համահունչ մեխանիզմներ՝ ֆինանսական համակարգի կայունությունն ապահովելու համար։
Կենտրոնական բանկին օրենքով կտրվեն համապատասխան իրավասություններ, որոնք հնարավորություն կտան հասնել բանկերի վերակառուցման նպատակներին։
Նշվում է, որ օրենսդրության բարելավումն անհրաժեշտ է բանկերի ձախողման դեպքում բանկերի կրիտիկական գործունեության անընդհատությունը և ֆինանսական համակարգի կայունությունն ապահովելու համար։
Նախագծով նախատեսվում է ներդնել լայն գործիքակազմ՝ բանկերի վերակառուցումն այնպես իրականացնելու համար, որ հնարավորինս նվազեցվի պետական արտակարգ աջակցություն տրամադրելու անհրաժեշտությունը և ապահովվի պետական միջոցների պաշտպանությունը։
ԱԺ ֆինանսավարկային և բյուջետային հարցերի մշտական հանձնաժողովը նախագծի վերաբերյալ տվել է դրական եզրակացություն։ Հանձնաժողովի դիրքորոշումը ներկայացրել է հանձնաժողովի նախագահ Ծովինար Վարդանյանը։