ՄԻՊ-ը խոսել է հաստատության կառուցվածքային փոփոխությունների և շենքային պայմանների խնդիրների մասին

3 րոպեի ընթերցում

Մարդու իրավունքների պաշտպան Անահիտ Մանասյանը հայտարարել է, որ ՄԻՊ հաստատության առջև շարունակում են կանգնած մնալ մի շարք չլուծված խնդիրներ՝ կապված կառուցվածքային փոփոխությունների, ռեսուրսների ավելացման, շենքային պայմանների և օրենսդրական բարեփոխումների հետ։ «Արմենպրես»-ի հաղորդմամբ՝ Ազգային ժողովի մշտական հանձնաժողովների համատեղ նիստում 2025 թվականի պետական բյուջեի կատարման տարեկան հաշվետվության քննարկման ժամանակ Մանասյանը նշել է, որ հաստատության կառուցվածքային փոփոխությունների հարցը երկար ժամանակ չի վերանայվել, մինչդեռ առկա են բազմաթիվ միջազգային հանձնարարականներ։

«Մենք կառուցվածքային հարցերի առնչությամբ վերջին փոփոխությունները շատ վաղուց ենք ունեցել, մինչդեռ հիմա ունենք բազմաթիվ միջազգային հանձնարարականներ, որոնք հենց հաստատության ներսում կառուցվածքային լուրջ փոփոխություններ են ենթադրում»,- ասել է նա։

Պաշտպանի խոսքով՝ այդ փոփոխությունները պահանջում են նաև լրացուցիչ ֆինանսական և մարդկային ռեսուրսներ։

«Դա ենթադրում է նաև ռեսուրսային ավելացում։ Իհարկե, մեր բյուջեն բավականին համեստ բյուջե է, բայց նույնիսկ այդ պայմաններում հետագա կառուցվածքային փոփոխությունների անհրաժեշտություն կա»,- նշել է Մանասյանը։

Նա անդրադարձել է նաև Մարդու իրավունքների պաշտպանի գրասենյակի շենքային պայմանների խնդրին՝ ընդգծելով, որ հարցը մինչ օրս վերջնական լուծում չի ստացել։

«Մեր հաստատության շենքի հետ կապված հարցը, թեև սկզբնական լուծում ստացել է, բայց փաստացի դա կիսալուծում է դարձել, որովհետև մինչև հիմա վերջնական լուծված չէ շենքի պայմանների բարելավման կամ նոր շենք տեղափոխվելու հետ կապված հարցը»,- ասել է նա։

Մանասյանի խոսքով՝ այս հարցին վերջերս անդրադարձել է նաև Եվրոպայի խորհրդի մարդու իրավունքների հանձնակատարը՝ Հայաստանին ուղղված բաց նամակում։

Պաշտպանը կարևորել է նաև ՄԻՊ ինստիտուտի անկախությանն առնչվող օրենսդրության հետագա զարգացումը։

«Մենք այս պահին ունենք նաև Մարդու իրավունքների պաշտպանի անկախությանը վերաբերելի տարբեր հանգամանքների հետ կապված օրենսդրության հետագա զարգացման անհրաժեշտություն»,- նշել է նա։

Միաժամանակ Մանասյանը դրական է գնահատել Ազգային ժողովի և կառավարության հետ համագործակցությունը՝ հիշեցնելով, որ վերջին տարիներին միջազգային մի շարք հանձնարարականներ կատարվել են օրենսդրական փոփոխությունների շնորհիվ։

«Այս գումարման Ազգային ժողովը նաև շատ կարևոր առաջընթաց է այս առումով գրանցել, որովհետև հանձնարարականների մի մասը կատարվել են օրենսդրական փոփոխությունների արդյունքում։ Մենք շատ լավ համագործակցել ենք, նաև կառավարության հետ հիանալիորեն աշխատել ենք այս առումով»,- ասել է նա։

Ըստ Պաշտպանի՝ դեռևս կան հանձնարարականներ, որոնք մնում են չկատարված և պահանջում են նոր օրենսդրական փոփոխություններ։

 

Հայերեն

ՀՖՖ նախագահի թեկնածուները երկուսն են

«ՀՀ վարչապետի գավաթ» մրցաշարի նպատակներից է առողջ և ազնիվ մրցակցությունը երեխաների շրջանում խթանելը. Փաշինյան

«Հայաստանի AI հնարավորությունը. գաղափարից՝ գործողություն» խորագրով քննարկում

Տելեկոմից մինչև ֆինտեխ, էներգետիկա, լոգիստիկա և ավելին. Team Group-ը Digitec-ում թվային նոր լուծումներ ու հարթակներ է ներկայացնում

Երևանի լողի թիմերը հաղթեցին «ՀՀ վարչապետի գավաթ» դպրոցականների մրցաշարում

Նախարարը հաջողություն է մաղթել դպրոցականների լողի մրցաշարի եզրափակիչ փուլի մասնակիցներին

Հայկ Մարտիրոսյանը «Total Chess World Championship Tour Pilot 2026»-ում զբաղեցրել է 9-րդ հորիզոնականը

ԱրարատԲանկը տեղաբաշխելու է «Ֆարմ Կրեդիտ Արմենիայի»՝ Հայաստանում առաջին սոցիալական պարտատոմսերը

Աբովյան համայնքին է վերադարձվել Հատիս փողոցում գտնվող հողամասը. Գլխավոր դատախազություն

3,79 միլիարդ դոլար՝ մեկ օրում. GTA VI-ը ռեկորդ է սահմանել տեսախաղերի պատմության մեջ