2 րոպեի ընթերցում
Հյուսիսատլանտյան դաշինքը մտադիր է ավելի շատ ուժեր ուղարկել Եվրոպայի արևելյան թև՝ Ռումինիայում բնակելի շենքի տանիքին անօդաչու թռչող սարքի անկման միջադեպից հետո: «Արմենպրես»-ի փոխանցմամբ՝ այս մասին Al Arabiya հեռուստաալիքի հետ հարցազրույցում հայտարարել է ՆԱՏՕ-ի Զինվորական կոմիտեի ղեկավար, իտալացի ծովակալ Ջուզեպպե Կավո Դրագոնեն:
«ՆԱՏՕ-ն արդեն քայլեր է ձեռնարկում արևելյան թևն ամրապնդելու համար…. Այո, մենք կազմակերպում ենք դա», - նշել է նա՝ պատասխանելով արևելք լրացուցիչ ուժեր ուղարկելու ծրագրերի և դաշինքի՝ Ռումինիայում տեղի ունեցածի նման միջադեպերի դեպքում անդամ պետությունների տարածքի «յուրաքանչյուր դյույմը» պաշտպանելու հանձնառության մասին հարցին:
Ծովակալը հավելել է, որ դաշինքը մտադիր է ստեղծել սխեմա, որը «կկապի ամեն ինչ՝ Բալթիկ ծովից մինչև Սև ծով»: Նա չի նշել, թե հատկապես ինչ ուժերի մասին է խոսքը և մանրամասներ չի հայտնել ենթադրվող սխեմայի մասին:
Դրագոնեն նշել է, որ ՆԱՏՕ-ն «ուսումնասիրում և կիրառում է հակազդեցության լավագույն միջոցները»:
Մայիսի 29-ին Ռումինիայի պաշտպանության նախարարությունը հայտնել է Գալացում բնակելի շենքի տանիքին անօդաչու թռչող սարքի անկման մասին: Բուխարեստը միջադեպի համար մեղադրել է Ռուսաստանին: