Ձորագյուղում 2018-2025 թվականներին սոցիալ-տնտեսական և կենսական նշանակության 27 ծրագիր է իրականացվել
2 րոպեի ընթերցում
Գեղարքունիքի մարզի Մարտունի համայնքի Ձորագյուղ գյուղում 2018-2025 թվականներին սուբվենցիոն ու պետական այլ ծրագրերով սոցիալ-տնտեսական և կենսական նշանակության 27 ծրագիր է իրականացվել, որոնց ուղղությամբ կատարված ընդհանուր ներդրումները կազմել են 1 միլիարդ 940 միլիոն 208 հազար դրամ։
Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, իրականացված ծրագրերի արդյունքում Ձորագյուղում կառուցվել է 36205 մետր խմելու, 5396 մետր ոռոգման ջրատարներ, 7790 մետր արտաքին լուսավորության ցանց, 1150 մետր գազատար, 1 կամուրջ և հենապատ, մանկապարտեզի խաղահրապարակ, 200 խորանարդ մետր ծավալով օրվա կարգավորիչ ջրամբար, հիմնանորոգվել 6716 գծամետր ներհամայնքային նշանակության ճանապարհ, վերանորոգվել մշակույթի տունը։ Վերանորոգման ու կապիտալ նորոգման ընթացքի մեջ են հիմնական դպրոցի և մանկապարտեզի շենքերի շինարարական աշխատանքները։
Իրականացված ծրագրերից 25-ը սուբվենցիոն են, որոնց ուղղությամբ կատարված ներդրումները կազմել են 1 միլիարդ 345 միլիոն 208 հազար դրամ, իսկ երկուսը դեռ ընթացքի մեջ գտնվող պետական ծրագրեր են՝ 595 միլիոն դրամի ներդրմամբ, որոնց արդյունքում վերանորոգվում կամ կապիտալ նորոգման են ենթարկվում հիմնական դպրոցի և մանկապարտեզի շենքերը ՀՀ կառավարության կողմից իրականացվող «300 դպրոց, 500 մանկապարտեզ» ծրագրի շրջանակներում։
ՀՀ կառավարության միջոցներով և Հայաստանի տարածքային հիմնադրամի պատվիրատվությամբ վերանորոգվում է Ձորագյուղի հիմնական դպրոցը, վերանորոգման ծրագրի պայմանագրային արժեքը կազմում է 303 միլիոն դրամ։ 2025 թվականի օգոստոսից մեկնարկած շինարարական աշխատանքները կավարտվեն 2026 թվականի մայիսին։
Ձորագյուղի մանկապարտեզի կապիտալ նորոգման ծրագրի պայմանագրային արժեքը կազմում է 292 միլիոն դրամ։ Շինարարական աշխատանքները, որոնք մեկնարկել են 2026 թվականի հունվարից, կավարտվեն 130 աշխատանքային օրվա ընթացքում։