2 րոպեի ընթերցում
Ուկրաինայի նախագահ Վոլոդիմիր Զելենսկին Եվրոպական քաղաքական համայնքի գագաթնաժողովի շրջանակում Երևանում հանդիպել է Վրաստանի վարչապետ Իրակլի Կոբախիձեի հետ։ Ինչպես հաղորդում է «Արմենպրես»-ը՝ վկայակոչելով «Ուկրաինասկայա Պրավդա»-ն, Ուկրաինայի նախագահը հայտնել է, որ հանդիպումը կայացել է գագաթնաժողովի շրջանակում։
«Մեր երկրների միջև իսկապես կան չլուծված հարցեր։ Կարևոր է երկխոսություն ունենալ բոլոր մակարդակներում։ Ուկրաինան միշտ հարգել է և շարունակում է հարգել Վրաստանը, նրա ինքնիշխանությունն ու ժողովրդին։ Մենք շարունակելու ենք առաջ տանել մեր համագործակցությունը»,- նշել է Զելենսկին։
Ուկրաինայի նախագահը չի մանրամասնել, թե կոնկրետ ինչ հարցեր են քննարկվել հանդիպման ընթացքում։
Վրաստանի կառավարության հայտարարության համաձայն՝ հանդիպումը կայացել է ուկրաինական կողմի նախաձեռնությամբ։
«Վերջին տարիներին պաշտոնական Կիևի և Թբիլիսիի հարաբերությունները շարունակում են մնալ լարված՝ պայմանավորված, մասնավորապես, Վրաստանի իշխանությունների դիրքորոշմամբ ռուս-ուկրաինական պատերազմի վերաբերյալ, ինչպես նաև երկրորդ ճակատ բացելու վերաբերյալ պարբերաբար հնչող մեղադրանքներով։
2024 թվականին Կոբախիձեն և իշխող կուսակցության մի խումբ ներկայացուցիչներ հայտնվել են Ուկրաինայի սահմանած 10-ամյա պատժամիջոցների ցանկում։
Բացի այդ, գրեթե չորս տարի Վրաստանում Ուկրաինայի դեսպան չի եղել՝ մինչև Միխայիլ Բրոդովիչի նշանակումը այդ պաշտոնում 2026 թվականի հունվարին»,-գրում է լրատվամիջոցը։