Արսեն Թորոսյանը Իրանի դեսպանի հետ քննարկել է սոցիալական ոլորտում համագործակցության խորացման հնարավորությունները
2 րոպեի ընթերցում
Աշխատանքի և սոցիալական հարցերի նախարար Արսեն Թորոսյանը ապրիլի 14-ին ընդունել է Հայաստանում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամիին։ Ինչպես «Արմենպրես»-ին տեղեկացրին աշխատանքի և սոցիալական հարցերի նախարարությունից, Թորոսյանն ընդգծել է, որ Իրանի հետ բարեկամական և փոխվստահության վրա հիմնված հարաբերությունների զարգացումը ՀՀ Կառավարության արտաքին քաղաքական առաջնահերթություններից է:
Արսեն Թորոսյանը ցավակցություն է հայտնել ռազմական գործողությունների հետևանքով ԻԻՀ-ում մահվան դեպքերի կապակցությամբ: Նախարարը շեշտել է, որ Հայաստանը խորապես մտահոգված է տարածաշրջանում ստեղծված իրավիճակով՝ ընդգծելով, որ խաղաղությունն ու կայունությունը կենսական նշանակություն ունեն ողջ տարածաշրջանի համար: Դեսպան Շիրղոլամին շնորհակալություն է հայտնել ստեղծված իրավիճակում ՀՀ Կառավարության և ժողովրդի կողմից Իրանին ցուցաբերված աջակցության համար։
Հանդիպման ընթացքում քննարկվել են աշխատանքի և սոցիալական պաշտպանության ոլորտում համագործակցության զարգացման հեռանկարները․ մասնավորապես՝ դիտարկվել են աշխատանքային միգրացիայի, մարդկային ներուժի և հմտությունների զարգացման, զբաղվածության խթանման նպատակով համատեղ վերապատրաստումների իրականացման և այլ ոլորտներում համագործակցության խորացման հնարավորությունները։ Դեսպան Շիրղոլամին այս առիթով շեշտել է, որ վերջին տարիներին ՀՀ-ում գրանցված աշխատատեղերի աճը իրապես տպավորիչ է։
Արսեն Թորոսյանը և Խալիլ Շիրղոլամին ընդգծել են ԱՍՀ նախարարության և Իրանի ոլորտային գերատեսչությունների միջև համագործակցության կարևորությունը և պատրաստակամություն հայտնել անհրաժեշտ ջանքեր ներդնել համատեղ նախատեսվող ծրագրերի արդյունավետ իրականացման գործում։