1 րոպեի ընթերցում
Իրանի հետ կապված երկու լցանավ Պարսից ծոցից Հորմուզի նեղուցով դուրս է եկել ԱՄՆ-ի կողմից խոստացված շրջափակումից կարճ ժամանակ առաջ: «Արմենպրես»-ի փոխանցմամբ՝ այս մասին հաղորդում է The National պարբերականը։
«Իրանի հետ կապված երկու նավթատար լցանավ երկուշաբթի օրը Պարսից ծոցից դուրս է եկել Հորմուզի նեղուցով՝ ԱՄՆ-ի կողմից իրանական նավահանգիստների և ափամերձ շրջանների պլանավորված շրջափակումից առաջ», - գրում է հրատարակությունը՝ վկայակոչելով նավագնացության Kpler և LSEG հարթակների տվյալները։
Հաղորդագրության համաձայն՝ Auroura լցանավը փոխադրում է իրանական ծագման նավթամթերք, իսկ New Future լցանավը տեղափոխում է դիզելային վառելիք, որը բեռնվել է ԱՄԷ-ի Համրիա նավահանգստում։
Ավելի վաղ ամերիկյան կենտրոնական հրամանատարությունը (CENTCOM) հայտարարել էր, որ Հորմուզի նեղուցի շրջափակումը կսկսվի ԱՄՆ-ի Արևելյան ափի ժամանակով ապրիլի 13-ին ժամը 10:00-ին (Երևանի ժամանակով՝ ժամը 18:00)։ Ամերիկյան ուժերը չեն խոչընդոտի ազատ նավագնացությանն այն նավերի համար, որոնք չեն մտնում իրանական նավահանգիստներ և դուրս չեն գալիս այնտեղից։