Միքայել Միրզոյանի անվան և 188 հանրակրթական դպրոցներին հարող տարածքում բացօթյա համերգասրահ կգործի
1 րոպեի ընթերցում
Երևանի Աջափնյակ վարչական շրջանում գործող Միքայել Միրզոյանի անվան և համար 188 հանրակրթական դպրոցներին հարող տարածքում բացօթյա համերգասրահ կգործի։
«Արմենպրես»-ի հաղորդմամբ՝ այս մասին Երևանի քաղաքապետարանում տեղի ունեցած գործակարգավարական նիստի ժամանակ հայտնեց Երևանի քաղաքապետարանի մշակույթի և տուրիզմի վարչության պետ Գոշ Սարգսյանը։
Նա նշեց, որ բացառիկ կառույցի վերանորոգման և տեխնիկական վերազինման արդյունքում հնարավոր կլինի ստանալ նոր մշակութային հարթակ՝ նախատեսված համերգային ծրագրերի, ամառային ճամբարների, ցուցահանդեսների և մշակութային այլ ծրագրերի իրականացման համար։
«Համերգասրահի պաշտոնական բացումը տեղի կունենա մայիսի 29-ին՝ Երևանի երաժշտական և արվեստի դպրոցների գալա համերգով։ Այն այնուհետև կդառնա մշտական գործող մշակութային տարածք, որը, նախնական հաշվարկներով, յուրաքանչյուր տարվա ընթացքում կարող է սպասարկել 8000 շահառուի»,-ասաց նա։
Սարգսյանը հավելեց նաև, որ ամռան ամիսներին կառույցում մոտ 400 երեխայի համար կգործի անվճար հիմունքներով մշակութային-կրթական ճամբար։