Վերջնարդյունքում ունենալու ենք ճանապարհորդելու ժողովրդավարացում. փոխնախարարը՝ վիզաների ազատականացման մասին
2 րոպեի ընթերցում
Հայաստան-Եվրամիություն վիզաների ազատականացման երկխոսության վերջնարդյունքում՝ ՀՀ քաղաքացիների համար վիզաների ազատականացման դեպքում լինելու է ճանապարհորդելու ժողովրդավարացում:
«Արմենպրես»-ի հաղորդմամբ ՝ այս մասին ասաց ՀՀ ներքին գործերի փոխնախարար Արմեն Ղազարյանը «Վիզաների ազատականացման ուղին. ԵՄ-Հայաստան համագործակցության ամրապնդումը վիզաների ազատականացման գործողությունների ծրագրի իրականացման շրջանակում» պանելային քննարկմանը:
«Վիզաների ազատականացման գործողությունների ծրագիրը միգրացիոն, տեղաշարժի ոլորտում, հանրային անվտանգության ոլորտում մեր արդիականացման ճանապարհային քարտեզը, կարծես, լինի: Եթե քայլ-քայլ շարժվենք դրանով, վերջում կունենանք արդի և ժամանակի մարտահրավերներին համարժեք, դիմակայուն ինստիտուտներ»,-ասաց Ղազարյանը:
Խոսելով մարդկանց վրա գործընթացի ազդեցության մասին՝ փոխնախարարն ասաց. «Վերջնարդյունքում մենք ունենալու ենք ճանապարհորդելու ժողովրդավարացում: Տարիներ շարունակ ճանապարհորդելը Հայաստանում ընկալվել է որպես էլիտար երևույթ, քչերը կարող էին ճանապարհորդել թե ֆինանսական կարողությունների տեսանկյունից, թե բյուրոկրատական սահմանափակումների տեսանկյունից: Հիմա վիզաների ազատականացումը շատերին է այդ հնարավորությունը տալու»:
Ըստ նրա՝ ճամփորդության ժողովրդավարացումը ևս Հայաստանի և ԵՄ-ի ընդհանուր արժեքի մասին է, ժողովրդավարության մասին է: