2 րոպեի ընթերցում
Ուկրաինայի նախագահ Վոլոդիմիր Զելենսկին հայտարարել է, որ Արաբական Միացյալ Էմիրությունների նախագահին առաջարկել է օգնել իրանական օդային հարձակումներից պաշտպանվելու գործում։ «Արմենպրես»-ի փոխանցմամբ՝ այս մասին Զելենսկին ասել է ԱՄԷ նախագահ Մուհամմադ բին Զայեդ Ալ Նահյանի հետ հեռախոսազրույցում։
Զելենսկին X հարթակում գրել է, որ Նահյանի հետ քննարկել են Մերձավոր Արևելքում և Պարսից ծոցի տարածաշրջանում տիրող իրավիճակը։
Ըստ Զելենսկու՝ Նահյանն իրեն հայտնել է, որ Իրանը թիրախավորում է «ոչ միայն ռազմական օբյեկտներ, այլև բնակելի շենքեր, առևտրի կենտրոններ, նույնիսկ մզկիթներ»։
«Մենք քննարկեցինք, թե ինչպես մենք կարող ենք օգնել այս իրավիճակում և աջակցել կյանքերի պաշտպանության գործում։ Մենք համաձայնության եկանք, որ մեր թիմերը կաշխատեն այս հարցի շուրջ», - գրել է Ուկրաինայի նախագահը։
The Associated Press գործակալությունը հիշեցնում է, որ մարտի 1-ին Մեծ Բրիտանիայի վարչապետ Քիր Սթարմերը հայտարարել է, որ ուկրաինացի և բրիտանացի փորձագետները համատեղ կաշխատեն՝ օգնելու Մերձավոր Արևելքի երկրներին խոցել իրանական անօդաչու թռչող սարքերը։
Իսրայելը և ԱՄՆ-ն փետրվարի 28-ից հարվածներ են հասցնում Իրանին, որն էլ պատասխան հարվածներ է հասցնում Իսրայելին և տարածաշրջանի երկրներում գտնվող ամերիկյան ռազմաբազաներին և էներգետիկ օբյեկտներին։