1 րոպեի ընթերցում
«Հայկական Կարիտաս» բարեսիրական հասարակական կազմակերպությունը, «Կարիտաս Ֆորարլբերգի» ֆինանսավորմամբ և Գյումրիի քաղաքապետարանի աջակցությամբ, իրականացրել է հերթական սոցիալական նախաձեռնությունը: Գյումրիի տնակային ավաններում բնակվող ծայրահեղ կարիքավոր ընտանիքներին տրամադրվել է բրիկետ (վառելանյութ)։
Վառելանյութի բաշխումն իրականացվել է Գյումրիի քաղաքապետարանի տրամադրած ցուցակների հիման վրա: Բրիկետների՝ Բասեն բնակավայրից Գյումրի տեղափոխման աշխատանքները ևս ապահովել է քաղաքապետարանը։ Աջակցություն են ստացել «Վարդ բաղ» թաղամասի հանրակացարանի, Անտառավան 26 վթարային շենքի, ինչպես նաև Սևյան և Ղանդիլյան փողոցների տնակային ավանների բնակիչները։
«Արմենպրես»-ի թղթակցի հետ զրույցում «Հայկական Կարիտաս»-ի ինժեներ Էդգար Հակոբյանը կարևորել է նախաձեռնության երկակի նշանակությունը՝ նշելով, որ այս ծրագրով երկու կարևոր հարց են լուծում. նախ՝ տնակներում կամ ժամանակավոր կացարաններում բնակվող համաքաղաքացիների ջեռուցման խնդիրն է թեթևանում, և երկրորդ՝ օգտագործվում է բացառապես էկոլոգիապես մաքուր վառելիք։
Արդեն բաշխվել է 8 տոննա բրիկետ, իսկ մնացած 2 տոննան շահառուներին կհասնի առաջիկա օրերին։