2 րոպեի ընթերցում
Իրանը բողոքի նոտա է հանձնել Նիդեռլանդների դեսպանին՝ կապված այդ երկրի դիվանագետներից մեկի կողմից Իսլամական Հանրապետություն արգելված ապրանքներ ներմուծելու փորձի հետ։ Ինչպես հաղորդում է «Արմենպրես»-ը, այս մասին հայտնում է իրանական «Մեհր» լրատվական գործակալությունը։
«Ի պատասխան հոլանդացի դիվանագետի անօրինական գործողությունների, որը փորձել է մաքսանենգ ճանապարհով արգելված ապրանքներ ներմուծել Իրան, Իրանը խիստ բողոք է ներկայացրել Թեհրանում Նիդեռլանդների դեսպան Էմիլ Ֆրեդերիկ Դյուբոնին։ Արտաքին գործերի նախարարությունը ընդգծել է, որ հոլանդացի դիվանագետի առգրավված բեռը պարունակում էր ապրանքներ, որոնց ներմուծումն ու օգտագործումը արգելված է Իրանի օրենսդրությամբ, և որ առգրավման գործընթացը իրականացվել է Դիվանագիտական հարաբերությունների մասին Վիեննայի կոնվենցիայի դրույթներին, այդ թվում՝ 36-րդ հոդվածի 2-րդ կետին համապատասխան, և պահպանվել են բոլոր համապատասխան արձանագրությունները», - ասվում է ԱԳՆ հայտարարության մեջ։
Միջադեպը տեղի է ունեցել հունվարի 28-ին, սակայն դրա մասին հայտնի է դարձել միայն վերջերս։ Լրատվամիջոցների տեղեկություններով՝ դիվանագետը հրաժարվել է իր ուղեբեռը սկանավորման հանձնել, որից հետո այն առգրավվել է օդանավակայանի աշխատակիցների կողմից, որոնք ներսում հայտնաբերել են Starlink մոդեմ և արբանյակային հեռախոս։ Արբանյակային ինտերնետային սարքավորումների, այդ թվում՝ Starlink համակարգերի ներմուծումն ու օգտագործումը Իրանում արգելված է։