2 րոպեի ընթերցում
Գերմանիայի խոշորագույն ավիաընկերության՝ Lufthansa-ի հարյուրավոր չվերթներ փետրվարի 12-ին չեղարկվել են օդաչուների և բորտուղեկցորդների գործադուլի պատճառով։ Ինչպես հաղորդում է «Արմենպրես»-ը, այս մասին հայտնում է Reuters գործակալությունը։
Ընկերությունը տվյալներ չի տրամադրել չեղարկված չվերթների կամ տուժած ուղևորների թվի վերաբերյալ, սակայն նշել է, որ գործադուլը հանգեցնում է «լայնածավալ չեղարկումների»։
Գերմանիայի օդանավակայանների ասոցիացիայի գնահատականներով՝ գործադուլի պատճառով չեղարկվելու է ավելի քան 460 չվերթ, ինչը կազդի գրեթե 70,000 ուղևորի վրա։
Չեղարկված չվերթների ցանկում են ինչպես տեղական, այնպես էլ միջազգային ուղղություններ։
Գործադուլը, որը կազմակերպվել է օդաչուների միության և բորտուղեկցորդների միության կողմից, տեղի է ունենում այն ժամանակ, երբ Գերմանիայի մայրաքաղաքում փետրվարի 12-ին մեկնարկում է Բեռլինի կինոփառատոնը, իսկ քաղաքական գործիչներն ու բարձրաստիճան զինվորականները պատրաստվում են մասնակցել Մյունխենի անվտանգության համաժողովին, որը սկսվելու է փետրվարի 13-ին։
Օդաչուները տարաձայնություններ ունեն Lufthansa ավիաընկերության և դրա բեռնափոխադրումների բաժնի հետ կենսաթոշակային վճարումների հարցով։
Lufthansa-ն պնդում է, որ չունի ֆինանսական կարողություններ ներկայացված պահանջները բավարարելու համար։