2 րոպեի ընթերցում
Թուրքիայի արտգործնախարար Հաքան Ֆիդանը հայտարարել է, որ Թուրքիան հույս ունի, որ ԱՄՆ-ն չի տրվի Իսրայելի սադրանքներին և չի հարձակվի Իրանի վրա:
Ինչպես հաղորդում է «Արմենպրես»-ը, Հաքան Ֆիդանն այդ մասին հայտարարել է իր իրանցի գործընկեր Աբբաս Արաղչիի հետ մամուլի ասուլիսի ժամանակ:
«Մենք ականատես ենք լինում Իսրայելի փորձերին՝ համոզելու ԱՄՆ-ին հարվածել Իրանին։ Իսրայելի այս ջանքերը կարող են լուրջ վնաս հասցնել մեր տարածաշրջանի փխրուն իրավիճակին։ Մենք հույս ունենք, որ ԱՄՆ ղեկավարությունը կգործի խելամտորեն և կկանխի դա», - ասել է Ֆիդանը:
ԱՄՆ նախագահ Դոնալդ Թրամփը հայտարարել էր, որ ամերիկյան «հսկայական նավատորմ» է շարժվում դեպի Իրան՝ հույս հայտնելով, որ Թեհրանը կհամաձայնի նստել բանակցությունների սեղանի շուրջ և հասնել «արդար և հավասար» համաձայնագրի, որը կենթադրի միջուկային զենքից լիակատար հրաժարում։
Թրամփը հիշեցրել էր, որ 2025 թվականի հունիսին Միացյալ Նահանգները հարվածներ է հասցրել Իրանի միջուկային օբյեկտներին «Կեսգիշերային մուրճ» գործողության շրջանակներում՝ ասելով, որ հաջորդ հարձակումն ավելի վատ կլինի։
Ստամբուլում հունվարի 30-ին Թուրքիայի ԱԳ նախարար Հաքան Ֆիդանի հետ հանդիպման ժամանակ Իրանի արտգործնախարար Աբբաս Արաղչին էլ հայտարարել է, որ Իրանի Իսլամական Հանրապետությունը կրկին պատրաստ է բանակցություններ սկսել Միացյալ Նահանգների հետ միջուկային համաձայնագրի շուրջ։ Նա հավելել է, որ Իրանը երբեք չի ծրագրել միջուկային զենք մշակել: