2 րոպեի ընթերցում
Դանիայի վարչապետ Մետե Ֆրեդերիկսենը հունվարի 23-ին հայտարարել է, որ կիսում է ՆԱՏՕ-ի գլխավոր քարտուղար Մարկ Ռյուտեի դիրքորոշումն այն մասին, որ հարկավոր է Արկտիկայում ուժեղացնել պաշտպանությունը։ «Արմենպրես»-ի փոխանցմամբ՝ այս մասին հաղորդում է Reuters գործակալությունը»։
«Մենք համաձայն ենք, որ ՆԱՏՕ-ն պետք է մեծացնի ներգրավվածությունն Արկտիկայում։ Արկտիկայում պաշտպանությունն ու անվտանգությունը վերաբերում են ամբողջ դաշինքին», - հայտնել է նա սոցիալական ցանցերում։
Հունվարի 23-ին ավելի ուշ նա կմեկնի Գրենլանդիա՝ Դանիայի ինքնավար տարածք՝ հանդիպելու կղզու վարչապետ Յենս-Ֆրեդերիկ Նիլսենի հետ։
Իր հերթին, Դանիայի արտգործնախարար Լարս Լյոկե Ռասմուսենը հունվարի 23-ին ասել է, որ դանիացի և ամերիկացի դիվանագետները հունվարի 22-ին Վաշինգտոնում ընդունել են հետագա գործողությունների պլան։
Հունվարի 21-ին Դավոսի համաժողովում ԱՄՆ նախագահ Դոնալդ Թրամփը հայտարարեց, որ հրաժարվել է Եվրոպայի մի քանի երկրների նկատմամբ մաքսատուրքեր սահմանելու պլանից, քանի որ կարողացել է ՆԱՏՕ-ի գլխավոր քարտուղար Մարկ Ռյուտեի հետ համաձայնեցնել Գրենլանդիայի շուրջ հնարավոր համաձայնագրի հիմնական կետերը։ Նա խոստացել է ուժ չկիրառել Գրենլանդիայի նկատմամբ վերահսկողություն հաստատելու համար։
Այս պլանի մանրամասների մասին դեռ պաշտոնապես չի հաղորդվել։