1 րոպեի ընթերցում
Ադրբեջանի պետական նավթային ընկերությունը (SOCAR) hամաձայնագիր է ստորագրել Իտալիայի Eni ընկերության հետ՝ Կոտ դ’Իվուարում նավթագազային Baleine հանքավայրի շահագործման նախագծին մասնակցության 10 տոկոս բաժնեմասի ձեռքբերման վերաբերյալ: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հաղորդել է SOCAR-ի մամուլի ծառայությունը:
Փաստաթուղթը Դավոսի Համաշխարհային տնտեսական ֆորումի շրջանակներում ստորագրել են SOCAR-ի նախագահ Ռովշան Նաջաֆը և Eni-ի գործադիր տնօրեն Կլաուդիո Դեկալցին:
Գործարքի արժեքը չի հրապարակվել: Ադրբեջանական ընկերության տվյալներով՝ գործարքի իրականացումը և դրա վերջնական փակումը կախված են համապատասխան կարգավորող մարմինների կողմից համաձայնության ստացումից և մյուս ստանդարտ պայմանների ու պահանջների կատարումից:
«Համաձայնագիրը լիովին համապատասխանում է SOCAR-ի գլոբալ ընդլայնման ռազմավարությանը՝ ընկերության համար ապահովելով Աֆրիկայի մայրցամաքի նավթագազային պաշարների հասանելիություն», - ասվում է տեղեկատվության մեջ:
Baleine-ը համարվում է Արևմտյան Աֆրիկայում նավթագազային խոշորագույն հանքավայրերից մեկը: Այն հայտնաբերվել է վերջին տարիներին: