Վարչապետը պատրաստվում է մասնակցել «Զայեդ» մարդկային եղբայրության մրցանակաբաշխության արարողությանը
2 րոպեի ընթերցում
ՀՀ վարչապետ Նիկոլ Փաշինյանը կառավարության հարցուպատասխանի ժամանակ անդրադարձել է «Զայեդ» մարդկային եղբայրության 2026 թվականի մրցանակին արժանանալու հանգամանքին՝ նշելով, որ այն իր համար մեծ պատիվ է և այդ գնահատականը թիմային աշխատանքի արդյունք է։ «Արմենպրես»-ի հաղորդմամբ՝ վարչապետը նշեց, որ մրցանակի մասին տեղեկացել է հեռախոսազանգի միջոցով և այն շնորհակալությամբ ընդունել է։
«Ինձ համար մեծ պատիվ է արժանանալ նման հեղինակավոր մրցանակի։ Այն արդյունքները, որոնք ընկած են այդ որոշման հիմքում, թիմային աշխատանքի արդյունք են՝ կառավարության, խորհրդարանական մեծամասնության և ամենակարևորը՝ Հայաստանի Հանրապետության քաղաքացիների։ Առանց նրանց աջակցության և վստահության այս ամենը հնարավոր չէր լինի իրականացնել»,- ասաց վարչապետը։
Նիկոլ Փաշինյանը նշեց, որ այս տարի «Զայեդ» մարդկային եղբայրության մրցանակը շնորհվելու է երեք մրցանակակրի․ իրեն, Ադրբեջանի նախագահ Իլհամ Ալիևին և Աֆղանստանում կանանց կրթության ոլորտում գործունեություն ծավալող ակտիվիստին։
Վարչապետը տեղեկացրեց, որ պատրաստվում է մասնակցել մրցանակաբաշխության արարողությանը։
Վարչապետ Նիկոլ Փաշինյանը ճանաչվել է «Զայեդ» մարդկային եղբայրության 2026 թվականի մրցանակակիր՝ ի նշանավորումն Հայաստանի և Ադրբեջանի միջև խաղաղության հաստատման, տարածաշրջանում համագործակցության և կայունության օրակարգը հետևողականորեն առաջ մղելու համար։ Նույն մրցանակին արժանացել է նաև Ադրբեջանի նախագահ Իլհամ Ալիևը, ինչը, ըստ նրա, ընդգծում է խաղաղության առաջմղման համատեղ ջանքերը։