2 րոպեի ընթերցում
Ռուսաստանը և Իրանը հանդես են գալիս Իրանի շուրջ ստեղծված լարվածության շուտափույթ ապաէսկալացման, խնդիրները դիվանագիտությամբ լուծելու օգտին: «Արմենպրես»-ի փոխանցմամբ՝ այս մասին հաղորդում է Կրեմլի մամուլի ծառայությունը՝ ամփոփելով ՌԴ նախագահ Վլադիմիր Պուտինի և Իրանի նախագահ Մասուդ Փեզեշքիանի հեռախոսազրույցը:
Ըստ հաղորդագրության՝ Փեզեշքիանը Պուտինին տեղեկացրել է Իրանի ղեկավարության ձեռնարկած ակտիվ ջանքերի մասին՝ ուղղված երկրում իրավիճակի կարգավորմանը։
«Նշվել է, որ Ռուսաստանը և Իրանը հետևողականորեն հանդես են գալիս համերաշխության դիրքերից՝ Իրանի շուրջ և, ընդհանուր առմամբ, տարածաշրջանում լարվածության շուտափույթ ապաէսկալացման, ծագող խնդիրների՝ բացառապես քաղաքական ու դիվանագիտական միջոցներով լուծման օգտին», - ասվում է հաղորդագրության մեջ։
Կողմերը նաև քննարկել են ռուս-իրանական ռազմավարական գործընկերության հետագա ամրապնդումը և տարբեր ոլորտներում համատեղ տնտեսական նախագծերի գործնական իրագործումը։
Ավելի վաղ ՌԴ նախագահի մամուլի քարտուղար Դմիտրի Պեսկովը հայտնել էր, որ երկու նախագահների միջև տեղի է ունեցել հեռախոսազրույց, սակայն այլ մանրամասներ չէր հայտնել։ Պեսկովը նշել էր, որ Ռուսաստանի նախագահը շարունակում է ջանքեր գործադրել տարածաշրջանի լարվածության ապաէսկալացմանը նպաստելու համար։
Այս ջանքերի շրջանակում Վլադիմիր Պուտինը զրուցել է նաև Իսրայելի վարչապետ Բենիամին Նեթանյահուի հետ։