1 րոպեի ընթերցում
Ֆրանսիայի նախագահ Էմանուել Մակրոնը հայտարարել է, որ դեկտեմբերի 10-ին Ուկրաինայի հարցով հեռախոսազրույց է ունեցել ամերիկացի իր գործընկեր Դոնալդ Թրամփի և եվրոպական մի քանի երկրների առաջնորդների հետ։ «Արմենպրես»-ի հաղորդմամբ՝ Մակրոնն այս մասին հայտնել է Ouest-France տարածաշրջանային թերթի ընթերցողների հետ հանդիպման ժամանակ։
«Սեն Մալոյի քաղաքապետարանում Ուկրաինայի հարցով հեռախոսազրույց եմ անցկացրել մի քանի գործընկերների և նախագահ Թրամփի հետ։ Այս 40 րոպեներին ծավալված քննարկումների ընթացքում փորձել ենք առաջընթացի հասնել բոլորիս հուզող թեմայի վերաբերյալ։ Ներողություն եմ խնդրում ուշանալու համար»,- ասել է Էմանուել Մակրոնը։
Ընթերցողների հետ հանդիպումը Ելիսեյան պալատի մամուլի ծառայությունը հեռարձակել է սոցիալական ցանցում։
«Ֆրանս Պրես» լրատվական գործակալությունը վկայակոչելով Ելիսեյան պալատի մամուլի ծառայությանը՝ հայտնում է, որ հեռախոսազրույցին մասնակցել են նաև Մեծ Բրիտանիայի վարչապետ Քիր Սթարմերը և Գերմանիայի կանցլեր Ֆրիդրիխ Մերցը։