Հարավային Կովկասում ականատես եղա Հայաստանի և Ադրբեջանի միջև դրական առաջընթացին․ ԵԱՀԿ գործող նախագահ

ԵԱՀԿ գործող նախագահ, Ֆինլանդիայի արտաքին գործերի նախարար Էլինա Վալտոնենը Հայաստանի և Ադրբեջանի միջև խաղաղության գործընթացում դրական առաջընթաց է արձանագրել: «Արմենպրես»-ի փոխանցմամբ՝ այս մասին Վալտոնենը նշել է ԵԱՀԿ նախարարական հանդիպման ընթացքում:

«Հարավային Կովկասում ես ականատես եղա Հայաստանի և Ադրբեջանի միջև խաղաղության գործընթացում դրական առաջընթացին: Օգոստոսին մենք հասանք կոնսենսուսի՝ Մինսկի խմբի ենթակառուցվածքները փակելու ուղղությամբ, որոնք զբաղվում էին Լեռնային Ղարաբաղի հակամարտության կարգավորմամբ»,- ասաց Վալտոնենը:

ԵԱՀԿ գործող նախագահը նշեց՝ Մինսկի խումբը և դրա ենթակառուցվածքները փակելը կնպաստի նաև ԵԱՀԿ բյուջեի հաստատման հիմնական խոչընդոտի վերացմանը:

ԵԱՀԿ Մինսկի խմբի գործընթացը մեկնարկել էր 1992 թվականին՝ ադրբեջանա-ղարաբաղյան հակամարտության կարգավորման նպատակով։ Կառույցի համանախագահներն էին ՌԴ-ն, ԱՄՆ-ն և Ֆրանսիան։ 

Հայաստանը և Ադրբեջանը 2025 թվականի օգոստոսի 8-ին Վաշինգտոնում ԵԱՀԿ-ին ուղղված համատեղ դիմում էին ստորագրել Մինսկի խումբը լուծարելու հարցով։   

2025 թվականի դեկտեմբերի 1-ից կառույցը դադարեցրել է գործունեությունը: