2 րոպեի ընթերցում
Լիբիայի արևելքում գտնվող Ներկայացուցիչների պալատի խոսնակ Ագիլա Սալեհը կոչ է արել երկրի Բարձրագույն ազգային ընտրական հանձնաժողովին անհապաղ կիրառել ուղիղ նախագահական ընտրությունների մասին օրենքը և հնարավորինս շուտ նախագահական ընտրություններ անցկացնել։
«Արմենպրես»-ի հաղորդմամբ՝ այս մասին հայտնում է իրանական Tasmin լրատվականը։
Ագիլա Սալեհը նաև խորհրդարանի աջակցությունն է հայտնել նախօրեին Լիբիայի մի քանի շրջաններում տեղի ունեցած խաղաղ ցույցերին՝ պահանջելով արագացնել նախագահական ընտրությունները։
Հայտարարության մեջ նա ընդգծել է, որ ցույցերն արտացոլում են «Լիբիայի ժողովրդի կամքը, որը կազմում է իշխանության աղբյուրը»։ Սալեհը շեշտել է, որ ընտրությունների արագացումը նպատակ ունի պահպանել երկրի միասնությունը և դրա ինստիտուտները, կանխել շարունակական պառակտումը և բավարարել քաղաքացիների ձգտումները՝ կառուցելու կայուն պետություն։
Ավելի վաղ Լիբիայի մի քանի քաղաքներում, այդ թվում՝ արևելյան և հարավային շրջաններում, տեղի են ունեցել մեծաքանակ խաղաղ ցույցեր, որոնց ընթացքում քաղաքացիները պահանջել են նախագահական ընտրությունների արագ անցկացում և իրենց քաղաքական ղեկավարությանն ընտրելու իրավունք։
2011 թվականին Լիբիայի նախկին առաջնորդ Մուամար Քադաֆիի տապալումից ի վեր Լիբիան բաժանված է երկու մրցակից կառավարությունների միջև՝ Տրիպոլիում գտնվող Ազգային միասնության կառավարությունը՝ Աբդուլ Համիդ Դեբեյբայի գլխավորությամբ, և արևելքում գտնվող վարչակազմը, որը նշանակվել է Ներկայացուցիչների պալատի կողմից և գլխավորել է Օսամա Համմադը։