2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ Ղազախստանը միանում է Աբրահամյան համաձայնագրերին՝ կարգավորելով Իսրայելի հետ հարաբերությունները։ «Արմենպրես»-ի փոխանցմամբ՝ այս մասին նա գրել է իր Truth Social հարթակում։
«Ես հենց նոր կարևոր հեռախոսազրույց անցկացրի Իսրայելի վարչապետ Բենիամին Նեթանյահուի և Ղազախստանի նախագահ Կասիմ-Ժոմարտ Տոկաևի միջև։ Ղազախստանն իմ նախագահության երկրորդ ժամկետում առաջին երկիրն է, որը միանում է Աբրահամյան համաձայնագրերին՝ առաջինը բազմաթիվներից», - գրել է Թրամփը։
Նա խոստացել է շուտով հայտարարել համաձայնագրի ստորագրման պաշտոնական արարողության մասին։
«Սա կարևոր քայլ է դեպի առաջ, որով կամուրջներ են կառուցվում ամբողջ աշխարհում», - հավելել է Թրամփը։
ԱՄՆ ղեկավարի խոսքով՝ ավելի շատ երկրներ են ձգտում միանալ Աբրահամյան համաձայնագրերին՝ «ուժեղների այս ակումբին»։
Աբրահամյան համաձայնագրերով կարգավորվում են հարաբերությունները Իսրայելի և արաբական երեք երկրների՝ Բահրեյնի, ԱՄԷ-ի և Մարոկկոյի միջև։ Համաձայնագրերը ստորագրվել են 2020 թվականին՝ Թրամփի առաջին ժամկետի ընթացքում: Դրանցով նախատեսվում է դիվանագիտական հարաբերությունների հաստատում և դեսպանատների բացում, ինչպես նաև համագործակցություն տնտեսության և այլ ոլորտներում:
Թրամփը նոյեմբերի 6-ին Սպիտակ տանն ընդունել է Կենտրոնական Ասիայի 5 երկրների՝ Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի ղեկավարներին։ Քննարկումների օրակարգում են եղել օգտակար հանածոները, դրանց մատակարարման շղթաների ընդլայնումը։