Չինաստանն ԱՄՆ-ի կողմից Միջուկային պայմանագրով ստանձնած պարտավորությունները կատարելու հույս է հայտնել
2 րոպեի ընթերցում
Չինաստանն ակնկալում է, որ Միացյալ Նահանգները, համաձայն իր միջազգային պարտավորությունների, կխուսափի միջուկային փորձարկումներ անցկացնելուց։ Ինչպես հաղորդում է «Արմենպրես»-ը՝ վկայակոչելով ՏԱՍՍ-ը, այս մասին հայտարարել է Չինաստանի արտաքին գործերի նախարարության խոսնակ Գո Ցզյակունը։
«Չինաստանը հույս ունի, որ Միացյալ Նահանգները հավատարմորեն կկատարի Միջուկային փորձարկումների համապարփակ արգելքի մասին պայմանագրով նախատեսված իր պարտավորությունները և միջուկային փորձարկումները դադարեցնելու իր խոստումը», - ընդգծել է նա ճեպազրույցի ժամանակ՝ մեկնաբանելով թեմայի վերաբերյալ ԱՄՆ նախագահ Դոնալդ Թրամփի վերջին հայտարարությունը։
ԱՄՆ նախագահ Դոնալդ Թրամփը հայտարարել է, որ Պենտագոնին հանձնարարել է վերսկսել միջուկային զենքի փորձարկումները 30 տարվա ընթացքում առաջին անգամ՝ դա պատճառաբանելով Ռուսաստանի և Չինաստանի հետ համաքայլ գնալու անհրաժեշտությամբ:
«Այլ երկրների փորձարկման ծրագրերի պատճառով ես Պատերազմի նախարարությանը հանձնարարել եմ սկսել մեր միջուկային զենքի փորձարկումները հավասար հիմունքներով։ Այդ գործընթացն անմիջապես կսկսվի», - գրել է նա Truth Social հարթակում Չինաստանի նախագահի հետ հանդիպումից առաջ։