Իսրայելը կորոշի, թե որ օտարերկրյա զորքերն են ընդունելի Գազայում հրադադարի ռեժիմը պահպանելու համար․ Նեթանյահու
2 րոպեի ընթերցում
Իսրայելի վարչապետ Բենիամին Նեթանյահուն հայտարարել է, որ Իսրայելն է որոշելու, թե օտարերկրյա որ ուժերին կթույլատրի կթույլատրի ընդգրկվել Գազայում նախատեսված միջազգային ուժերի կազմում։ «Արմենպրես»-ի փոխանցմամբ՝ այս մասին հայտնում է Reuters-ը։
Թեև Թրամփի վարչակազմը բացառել է ամերիկյան զորքեր ուղարկելը Գազա, այն բանակցություններ է վարում Ինդոնեզիայի, Արաբական Միացյալ Էմիրությունների, Եգիպտոսի, Կատարի, Թուրքիայի և Ադրբեջանի հետ՝ բազմազգ ուժերին մասնակցելու վերաբերյալ։
«Մենք վերահսկում ենք մեր սեփական անվտանգությունը, և մենք նաև միջազգային ուժերի վերաբերյալ հստակեցրել ենք, որ Իսրայելը կորոշի, թե որ ուժերն են մեզ համար անընդունելի։ Այսպես ենք մենք գործում ու շարունակելու ենք գործել», - ասել է Նեթանյահուն կառավարության նիստում։
Ավելի վաղ Նեթանյահուն ակնարկել էր, որ դեմ կլինի թուրքական անվտանգության ուժերի որևէ դերակատարմանը Գազայում:
ԱՄՆ պետքարտուղար Մարկո Ռուբիոն, որը հրադադարի ռեժիմը պահպանելու նպատակով այցելել էր Իսրայել, հայտարարել է, որ միջազգային ուժերը պետք է կազմված լինեն «այն երկրներից, որոնց հետ Իսրայելը հարմարավետ է զգում»:
Իսրայելը, որը երկու տարի շարունակ շրջափակման մեջ էր պահում Գազան, շարունակում է վերահսկել անկլավ մուտք գործելու բոլոր ուղիները։