Գեղարքունիքում կայացել է «ՀՀ վարչապետի գավաթ» դպրոցականների լողի մրցաշարի մարզային փուլը

«ՀՀ վարչապետի գավաթ» դպրոցականների լողի 2025 թվականին անցկացվող մրցաշարը կազմակերպվում է առաջին անգամ։ 

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, մրցաշարը կազմակերպում և անցկացնում է ՀՀ կրթության, գիտության, մշակույթի և սպորտի նախարարության կողմից ստեղծված հանձնաժողովը՝ համագործակցելով «Լողի հայկական դաշնություն» մարզական հասարակական կազմակերպության հետ։

Լողի մրցաշարն անցկացվում է 2 տարիքային խմբով՝ 3-6-րդ և 7-12-րդ դասարանների աշակերտների միջև, և երկու փուլով՝ մարզային և եզրափակիչ, որին կարող են մասնակցել հանրապետության բոլոր հանրակրթական դպրոցների աշակերտները, ովքեր լողով զբաղվելու համար հակացուցում չունեն:

Գեղարքունիքի մարզային փուլին հայտ ներկայացրած 37 դպրոցականը, մարզում փակ լողավազնների բացակայության պատճառով, մրցումներն անցկացրել է Ծաղկաձորի մարզական համալիրում։ 

Փոքր տարիքային խմբի մասնակիցները մրցել են 50, իսկ մեծերը՝ 100 մետր տարածությունում՝ ազատ ոճով։

Մրցումների ամփոփումից հետո մրցանակային տեղեր գրաված մասնակիցներին ՀՀ ԿԳՄՍ նախարարի խորհրդական Արման Անտոնյանը հանձնել է համապատասխան կարգի հավաստագրեր։ 

Հաղթողներից կձևավորվի մարզի հավաքական թիմը, որը 2025 թվականի նոյեմբերի 22-ին կմասնակցի «ՀՀ վարչապետի գավաթ» դպրոցականների լողի մրցաշարի հանրապետական փուլին։