5 րոպեի ընթերցում
Գյումրիում հոկտեմբերի 25-ին մեծ շուքով կազդարարվի Ավետիք Իսահակյանի ծննդյան 150-ամյակին նվիրված միջոցառումների մեկնարկը: Նախագիծն իրականացվում է ՀՀ կրթության, գիտության, մշակույթի և սպորտի նախարարության աջակցությամբ։ Միջոցառումները կանցկացվեն ինչպես Վարպետի հուշատուն-թանգարանում, այնպես էլ քաղաքի տարբեր մշակութային օջախներում։
Տոնական միջոցառումները կմեկնարկեն կեսօրին՝ Իսահակյանի հուշատուն-թանգարանում, որտեղ տարբեր հարթակներով և ձևաչափերով կանցկացվեն գիտական զեկույցներ, գրական քննարկումներ, թատերական ընթերցումներ, ինչպես նաև մանկական, երիտասարդական և նկարչական նախաձեռնություններ։ Միջոցառումներին լայն մասնակցություն են ցուցաբերելու հանրակրթական դպրոցները, միջին մասնագիտական ուսումնական հաստատությունները, արվեստի և մշակութային կազմակերպությունները, թանգարաններն ու գրադարանները։ Թանգարանում միջոցառումները կավարտվեն Ավետիք Իսահակյանի հոլոգրաֆիկ կերպարի ներկայացմամբ և պատմական Անիի վիրտուալ այցելությամբ։ Օրվա ամփոփումը տեղի կունենա Գյումրիի Թատերական հրապարակում՝ երեկոյան ժամը 17:00-ին՝ Գյումրու ժողովրդական գործիքների պետական նվագախմբի մասնակցությամբ։ Ծրագրի խորագիրն է՝ «Իսահակյանը՝ երգերի մեջ»։
Հոբելյանական տարվան Գյումրիի համայնքապետարանի մշակույթի և երիտասարդության հարցերի բաժինը սկսել է պատրաստվել դեռ տարեսկզբից։ «Տարեսկզբից բոլոր ուսումնական, մշակութային և կրթական հաստատությունները, ինչպես նաև անհատ ստեղծագործողները ներկայացրել են իրենց առաջարկությունները՝ թե՛ ծրագրի բովանդակության, թե՛ ձևաչափի վերաբերյալ։ Արդյունքում ձևավորվել է այն ծրագիրը, որը կիրականացվի հոկտեմբերի 25-30-ին։ Թանգարանային միջոցառումներից առանձնացնում եմ երկու կարևորագույն նորույթ՝ Վարպետի հոլոգրաֆիկ կերպարի ներկայացումը և պատմական Անիի վիրտուալ այցելությունը։ Սրանք անգնահատելի ձեռքբերումներ են թանգարանի համար»,-«Արմենպրես»-ի հետ զրույցում նշել է համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը՝ հավելելով, որ «Երգեր և երկեր» խորագիրը կրող փառատոնային ծրագիրը, ինչպես նաև վիրտուալ այցելությունն ու հոլոգրաֆիկ պատկերը իրականացվել են դրամաշնորհային ծրագրերի շրջանակում և ֆինանսավորվել են ՀՀ կրթության, գիտության, մշակույթի և սպորտի նախարարության կողմից։
«Երգեր և երկեր» խորագրով միջոցառումները կեզրափակվեն Թատերական հրապարակում՝ Ժողովրդական գործիքների պետական նվագախմբի մասնակցությամբ։ Բեմահարթակից կհնչեն բացառապես Իսահակյանի ստեղծագործությունների հիման վրա գրված երգեր, ինչպես նաև շիրակյան և շերամյան մեղեդիներ։
Հոկտեմբերի 30-ին՝ Ավետիք Իսահակյանի ծննդյան օրը, Թատերական հրապարակում՝ Վարպետի արձանի մոտ, կկայանա ծաղիկների խոնարհման արարողություն, որից հետո հուշատան թանգարանում կշարունակվեն հոլոգրաֆիկ պատկերի և վիառ ակնոցներով շրջայցի շնորհանդեսները։ Օրվա ընթացքում տեղի կունենան տարբեր տոնական միջոցառումներ․ «Կումայրի» արգելոց-թանգարանի ցուցասրահում կբացվի հատուկ ցուցադրություն՝ «Իսահակյանը արվեստի մեջ» վերնագրով՝ տարբեր կառույցների համագործակցությամբ։ Նախատեսվում է նաև հատուկ համերգ, իսկ Տիկնիկային թատրոնում կբեմադրվի «Քաղաքի խելոքները» ներկայացումը, որը, Լիլիթ Թովմասյանի խոսքով, կարևոր ձեռքբերում է քաղաքի մշակութային կյանքի համար։
«Այսպիսի նշանակալի իրադարձություններով ենք նշելու Վարպետի 150-ամյակը, սակայն հոբելյանական տարվա միջոցառումները չեն ավարտվի հոկտեմբերով։ Նոյեմբերին ևս կշարունակենք տարբեր ձևաչափերով »,-հավելել է Լիլիթ Թովմասյանը։