1 րոպեի ընթերցում
Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը զրուցել են Շարմ Էլ Շեյխում ընթացող Մերձավոր Արևելքի Խաղաղության գագաթնաժողովի շրջանակում: «Արմենպրես»-ի փոխանցմամբ՝ զրույցի տեսանյութն ու լուսանկարները տարածվել են սոցիալական ցանցերում:
Հայաստանի վարչապետի և Ադրբեջանի նախագահի զրույցին միացել է նաև Պակիստանի վարչապետ Շեհբազ Շարիֆը: Նա հայտնել է, որ շատ ուրախ է զրուցելիս տեսնել Հայաստանի վարչապետին և Ադրբեջանի նախագահին:
Հայաստանի վարչապետ Նիկոլ Փաշինյանը Պակիստանի վարչապետ Շեհբազ Շարիֆին հիշեցրել է երկու երկրներիի միջև դիվանագիտական հարաբերություններ հաստատելու մասին համատեղ կոմյունիկեն՝ ստորագրված 2025թ․ օգոստոսի 31-ին Չինաստանում:
ՀՀ վարչապետը մեկօրյա աշխատանքային այցով Եգիպտոսում է Ամերիկայի Միացյալ Նահանգների նախագահ Դոնալդ Թրամփի և Եգիպտոսի նախագահ Աբդել Ֆաթթահ աս-Սիսիի հրավերով: Շարմ Էլ Շեյխ քաղաքում Նիկոլ Փաշինյանն այսօր կմասնակցի Մերձավոր Արևելքի Խաղաղության գագաթնաժողովին։