1 րոպեի ընթերցում
Տաջիկստանի մայրաքաղաք Դուշանբեում հոկտեմբերի 9-ին Ռուսաստանի և Ադրբեջանի նախագահներ Վլադիմիր Պուտինը և Իլհամ Ալիևը հանդիպում կանցկացնեն։
«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով ՌԴ նախագահի մամուլի խոսնակ Դմիտրի Պեսկովի խոսքերը։
«Այո, վաղը հանդիպում կլինի Ադրբեջանի նախագահ Իլհամ Ալիևի հետ»,-լրագրողներին ասել է Պեսկովը։
Անդրադառնալով հանդիպման օրակարգին՝ նա նաև նշել է, որ հիմնական թեման լինելու են երկկողմ հարաբերություններին վերաբերող հարցերը։
«Երկկողմ հարաբերություններն առաջնային են։ Սա մեր հարաբերությունների օրակարգի գլխավոր կետն է։ Այն փաստը, որ հանդիպումը տեղի է ունենում, խոսում է երկու առաջնորդների մտադրության մասին՝ քննարկելու բոլոր հրատապ հարցերը»,-ընդգծել է Դմիտրի Պեսկովը։
Կրեմլի խոսնակը հավելել է, որ չի կարող խոսել իր ադրբեջանցի գործընկերների անունից, բայց ռուսական կողմը դրական վերաբերմունք ունի հանդիպման շուրջ։
Ռուսաստանի նախագահը պետական այցով ժամանել է Տաջիկստան։ Դուշանբեում հոկտեմբերի 10-ին կկայանա Անկախ պետությունների համագործակցության անդամ պետությունների ղեկավարների խորհրդի նիստը։