2 րոպեի ընթերցում
Santé Arménie Medical Academy-ի նախաձեռնությամբ` Գյումրու բժշկական կենտրոնում անցկացվել է «Ցավի կառավարում» թեմայով մասնագիտական դասընթաց, որին մասնակցել է 100 բուժքույր։ Դասընթացը նպատակ ունի բարձրացնել բուժքույրերի մասնագիտական գիտելիքների և հմտությունների մակարդակը։ Մինչև դասընթացի մեկնարկը և ավարտից հետո մասնակիցները հանձնել են թեստեր:
«Արմենպրեսը»-ին Գյումրիի բժշկական կենտրոնի մամուլի բաժնից տեղեկացրեցին, որ դասընթացը վարել է մասնագետ Մարի Սարեանը, ով բուժքույրերին է փոխանցել ժամանակակից մեթոդներ և մասնագիտական փորձ։
Santé Arménie Medical Academy-ն և Գյումրիի բժշկական կենտրոնը ծրագրում են շարունակել համագործակցությունը՝ պարբերաբար կազմակերպելով բուժքույրերի վերապատրաստման ծրագրեր։ Նման նախաձեռնությունները միտված են Գյումրիում բուժօգնության որակի բարձրացմանն ու բուժաշխատողների մասնագիտական զարգացմանը։
Santé Arménie Medical Academy կազմակերպում է տեսական և գործնական դասընթացներ՝ եվրոպացի մասնագետների ներգրավմամբ։ 2021 թվականին ստեղծվել է նաև առցանց հարթակ՝ վեբինարներով և բարձրակարգ դասընթացներով, որոնց մի մասը ՀՀ առողջապահության նախարարության կողմից կրեդիտավորվում է։ Այս նախաձեռնությունները միտված են Հայաստանի բժիշկներին և բուժաշխատողներին հասանելի դարձնել եվրոպական մակարդակի շարունակական բժշկական կրթություն։