2 րոպեի ընթերցում
Իրանի Իսլամական Հանրապետության նախագահ Մասուդ Փեզեշքիանը հայտարարել է, որ Իրանը երբեք չի ձգտել միջուկային ռումբ ստեղծել և ապագայում ևս դա չի անի։ «Արմենպրես»-ի փոխանցմամբ, ինչպես հայտնում է IRNA գործակալությունը, այս մասին Փեզեշքիանը հայտարարել է ՄԱԿ գլխավոր ասամբլեայի 80-րդ նստաշրջանում իր ելույթում։
Նախագահ Փեզեշքիանը դատապարտել է հունիսին Ամերիկայի Միացյալ Նահանգների կողմից Իրանի վրա հարձակումը՝ հայտարարելով, որ Իսրայելի և ԱՄՆ-ի ավիահարվածները՝ քաղաքներին, տներին և ենթակառուցվածքներին, խախտել են միջազգային իրավունքը և հասցվել են այն ժամանակ, երբ Թեհրանը դիվանագիտական բանակցություններ էր վարում:
Իրանի նախագահը հայտարարել է, որ հարվածների հետևանքով զոհվել են հրամանատարներ, քաղաքացիական անձինք, երեխաներ, կանայք, գիտնականներ և ազգային էլիտայի ներկայացուցիչներ, ինչը լուրջ հարված է հասցրել վստահությանը և խաղաղության հասնելու հեռանկարներին:
ԱՄՆ Զինված ուժերը 2025թ․ հունիսի 22-ին ավիահարվածներ են հասցրել Իրանի երեք հիմնական միջուկային օբյեկտներին, ինչից հետո ԱՄՆ նախագահ Դոնալդ Թրամփը Թեհրանին նախազգուշացրել է, որ խաղաղությանը չհամաձայնելու դեպքում, ավելի կործանարար հարվածներ կհասցվեն:
ՄԱԿ գլխավոր քարտուղար Անտոնիո Գուտերեշն ԱՄՆ-ի հարվածներն անվանել է վտանգավոր էսկալացիա և ուղղակի սպառնալիք միջազգային խաղաղության ու անվտանգության համար: