2 րոպեի ընթերցում
Թուրքիայի արտաքին գործերի նախարար Հաքան Ֆիդանը Հռոմում Իտալիայի փոխվարչապետ և արտաքին գործերի նախարար Անտոնիո Տայանիի հետ համատեղ մամուլի ասուլիսի ժամանակ միջազգային հանրությանը կոչ է արել Իսրայելի դեմ միջոցներ ձեռնարկել:
«Արմենպրես»-ի փոխանցմամբ՝ այս մասին գրում են իսրայելական ԶԼՄ-ները։
Հաքան Ֆիդանը, ուշադրություն հրավիրելով այն փաստի վրա, որ միջազգային հանրության օրակարգի գլխավոր հարցը Իսրայելի կողմից Գազայում իրականացված գործողություններն են և տարածաշրջանում վարվող էքսպանսիոնիստական քաղաքականությունը, ասել է.
«Իսրայելը, Դոհայում հարձակում կազմակերպելով, կրկին խախտել է մեկ այլ երկրի ինքնիշխանությունը: Ես ուզում եմ ևս մեկ անգամ ընդգծել, որ մենք լիովին համերաշխ ենք Կատարի հետ՝ կապված այս վախկոտ հարձակման հետ»:
Նշելով, որ Կատարը մի երկիր է, որը հաջողությամբ միջնորդական գործունեություն է ծավալել «խաղաղ արտաքին քաղաքականության» շրջանակներում, Ֆիդանն ասել է, որ Իսրայելի էքսպանսիոնիստական քաղաքականությունը, որը տարածվում է նաև Կատարի վրա, պետք է «արթնացնի» նրանց, ովքեր մինչ օրս աչք են փակել Բենիամին Նեթանյահուի գործողությունների վրա։
«Մենք կոչ ենք անում միջազգային հանրությանը ձեռնարկել անհրաժեշտ միջոցներ Իսրայելի դեմ։ Մենք ուրախ ենք, որ վերջերս Արևմտյան շատ երկրներ ՄԱԿ-ի Գլխավոր ասամբլեայի ժամանակ հայտարարել են Պաղեստինի պետությունը ճանաչելու իրենց մտադրության մասին», - ասել է նա։