Թուրքիայի, Սաուդյան Արաբիայի, Եգիպտոսի և Պակիստանի արտաքին գործերի նախարարները կհանդիպեն Ստամբուլում

Թուրքիայի, Սաուդյան Արաբիայի, Եգիպտոսի և Պակիստանի արտաքին գործերի նախարարները օգոստոսի վերջին քառակողմ հանդիպում կանցկացնեն Ստամբուլում։

Ինչպես հաղորդում է «Արմենպրես»-ը, հանդիպման անցկացման մասին հայտարարվել է Թուրքիայի արտաքին գործերի նախարար Հաքան Ֆիդանի և նրա պակիստանցի գործընկեր Իսհակ Դարի հեռախոսազրույցի ընթացքում։

Թուրքական լրատվամիջոցների տվյալներով՝ Իսհակ Դարն ընդունել է Հաքան Ֆիդանի հրավերը և համաձայնել մասնակցել Ստամբուլում նախատեսվող հանդիպմանը։

Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ մեծ է հավանականությունը, որ Եգիպտոսը կմիանա Թուրքիայի, Սաուդյան Արաբիայի և Պակիստանի միջև կնքված Մեքքայի համաձայնագրին։

Ըստ համաձայնագրի՝ մասնակից երկրներից մեկի դեմ արտաքին հարձակումը դիտարկվելու է որպես հարձակում համաձայնագրի մյուս մասնակիցների դեմ։