Կիրանցում կառուցվում է 50 տուն. Փաշինյանը քաղաքացիներին հրավիրում է տեսնել սահմանազատման արդյունքը
1 րոպեի ընթերցում
Հայաստանի վարչապետ Նիկոլ Փաշինյանը քաղաքացիներին հրավիրում է Կիրանց գյուղ՝ տեսնելու սահմանազատման արդյունքը:
«Արմենպրես»-ի փոխանցմամբ՝ Փաշինյանն այս մասին ասաց ԱԺ–կառավարություն հարցուպատասխանին՝ անդրադառնալով ընդդիմադիր «Հայաստան» խմբակցության պատգամավոր Աննա Գրիգորյանի հարցին:
Պատգամավորը նշեց, որ չի տեսնում անվտանգության երաշխիքներ, անվտանգության մեխանիզմ:
Վարչապետը ՀՀ բոլոր քաղաքացիներին հրավիրեց գնալ Կիրանց գյուղ, տեսնել սահմանազատման արդյունքը:
«Ինձ համար կա օրինակելի բնակավայր: Խորհրդային Միության ժամանակներում ասում էին ցուցադրական գյուղ, այսօր Տավուշի մարզի Կիրանց գյուղը ցուցադրական բնակավայր է: Ասում էին, թե մարդիկ այնտեղից գնում են: Կիրանցը Ձեր նշած լավագույն ժամանակներում ունեցել է 84 տուն, այսօր 50 տուն է կառուցվում Կիրանցում»,–ասաց Փաշինյանը՝ արձագանքելով ընդդիմադիր պատգամավորին:
2024 թվականին Հայաստանի և Ադրբեջանի միջև սահմանազատում էր իրականացվել Տավուշի մի շարք հատվածներում, այդ թվում՝ Կիրանցի հատվածում: