Պուտինը հնարավոր է համարում Սլովակիայի օբյեկտներում ԱՄՆ-ի հետ ատոմային ոլորտում համագործակցությունը
1 րոպեի ընթերցում
Ռուսաստանն ապագայում կարող է ատոմային ոլորտում Միացյալ Նահանգների հետ համագործակցություն սկսել Սլովակիայի օբյեկտներում: Ռուսաստանի նախագահ Վլադիմիր Պուտինն այս մասին ասել է Պեկինում Սլովակիայի վարչապետ Ռոբերտ Ֆիցոյի հետ հանդիպման ընթացքում: «Արմենպրես»-ի փոխանցմամբ՝ այս մասին հաղորդում է ՏԱՍՍ-ը:
Պուտինը նշել է, որ Ռուսաստանի «Ռոսատոմ» պետական կորպորացիան արդեն վաղուց հուսալի գործընկեր է սլովակ գործընկերների համար:
Ռուսաստանի ղեկավարը նշել է, որ ամերիկացի գործընկերների հետ, թեև անուղղակիորեն, արդեն բարձրացրել է Զապորոժիեի ԱԷԿ-ում հնարավոր համագործակցության հարցը: Ընդ որում, Պուտինն ասել է, որ դա, ընդհանուր առմամբ, վերաբերում է նաև ուկրաինական կողմին:
«Եվ եթե ստեղծվեն բարենպաստ հանգամանքներ, մենք դա քննարկել ենք ամերիկյան կողմի հետ, կարող ենք նույնիսկ երեքով աշխատել Զապորոժիեի ԱԷԿ-ում: Դա, կարծես, չի վերաբերում Սլովակիային, բայց նախապայման է, որ մենք համատեղ նախագծեր իրականացնենք Սլովակիայի շուկայում», - ասել է Պուտինը: