Հունգարիայի վարչապետն իր «լիարժեք համերաշխությունն» է հայտնել Ուկրաինային

Հունգարիայի վարչապետ Պետեր Մադյարն իր «լիարժեք համերաշխությունն» է հայտնել Ուկրաինային։ «Արմենպրես»-ի փոխանցմամբ՝ այս մասին X հարթակում գրառման մեջ հայտնել է վարչապետն Ուկրաինայի նախագահ Վոլոդիմիր Զելենսկու հետ ԵՄ գագաթնաժողովի շրջանակում երկկողմ հանդիպման ավարտից հետո։

«Բրյուսելում երկկողմ հանդիպում ունեցա Ուկրաինայի նախագահ Վոլոդիմիր Զելենսկու հետ։ Ողջունեցի Հունգարիայի և Ուկրաինայի միջև ձեռք բերված քաղաքական պայմանավորվածությունն՝ ուղղված Անդրկարպատիայում հունգարական փոքրամասնության իրավունքների ամրապնդմանը», - նշել է նա։

«Ուկրաինայի խորհրդարանի կողմից փոքրամասնությունների կրթության մասին օրենքի ընդունումը և դրա անհապաղ կիրառման մեկնարկը մենք համարում ենք փոխադարձ վստահության վերականգնմանն ուղղված առաջին քայլ», - նշել է Մադյարը՝ հավելելով, որ խորհրդակցությունները կշարունակվեն նախարարների մակարդակով։

«Մենք նաև համաձայնեցինք, որ երկու երկրների շահերից է բխում նոր հիմք ստեղծել մեր քաղաքական և տնտեսական հարաբերությունների համար։ Ես Ուկրաինայի նախագահին հայտնել եմ իմ լիակատար համերաշխությունն իր երկրի դեմ ռուսական դաժան ագրեսիայի պայմաններում, որը շարունակվում է արդեն գրեթե 5 տարի», - հավելել է Մադյարը։

Նրա հայտարարության համաձայն՝ Հունգարիան պատրաստ է բոլոր հնարավոր դիվանագիտական ​​միջոցներով օգնություն ցուցաբերել՝ շուտափույթ հրադադար հաստատելու և տևական խաղաղության հասնելու համար։

Հունիսին Հունգարիայի վարչապետ Պետեր Մադյարը հայտարարել է, որ Բուդապեշտը և Կիևը համապարփակ համաձայնության են եկել հունգարական փոքրամասնության լեզվական, կրթական, մշակութային և քաղաքական իրավունքներն ընդլայնելու վերաբերյալ։

Ուկրաինայի և Հունգարիայի միջև հարաբերությունները վատթարացել են 2017 թվականից, երբ Կիևն ընդունել էր օրենք, որը զգալիորեն ընդլայնեց պետական լեզվի օգտագործումը կրթության մեջ, իսկ երկու տարի անց սահմանափակեց հունգարերենի օգտագործումը երկրում։