Զելենսկին հայտարարել է, որ եռօրյա դադարից հետո վերսկսվելու են ռուսական նավթավերամշակման գործարաններին հարվածները

Ուկրաինայի նախագահ Վոլոդիմիր Զելենսկին հայտարարել է, որ Կիևը եռօրյա դադարից հետո վերսկսում է Ռուսաստանի նավթավերամշակման գործարաններին հարվածները: «Արմենպրես»-ի փոխանցմամբ՝ այս մասին նա ասել է Financial Times-ին տված հարցազրույցում:

«Արգելքը վերացված է։ Արդեն բավական է», - ասել է Ուկրաինայի նախագահը։

Զելենսկին նշել է, որ Կիևը երեք օրով դադարեցրել է ՌԴ նավթավերամշակման գործարանների վրա հարձակումները՝ Վաշինգտոնի պահանջները կատարելու համար, սակայն Ռուսաստանը շարունակել է իր հարվածները: Միևնույն ժամանակ նա նշել է, որ Ուկրաինայի զինված ուժերը դադարել են ստանալ բալիստիկ հրթիռների հարվածների մասին վաղ նախազգուշացման ամերիկյան տվյալները, իսկ Starlink արբանյակային ինտերնետի աշխատանքում խափանում է տեղի ունեցել։

Զելենսկին մերժել է այն գաղափարը, թե դա կարող էր կապված լինել տեխնիկական խնդիրների հետ:

Հոկտեմբերի 11-ին ԱՄՆ նախագահ Դոնալդ Թրամփը հայտարարել էր, որ Ռուսաստանը և Ուկրաինան համաձայնել են էներգետիկ հրադադարի, սակայն Կիևը հայտնել է, որ չնայած դրան՝ Մոսկվան շարունակել է հարվածները էներգետիկ ենթակառուցվածքներին:

Բացի այդ, Թրամփն Ուկրաինայից պահանջել էր դադարեցնել հարվածները ռուսական նավթավերամշակման գործարաններին՝ նշելով, որ դա է աշխարհում վառելիքի գների աճի պատճառը: Թրամփը նաև համաձայնության է եկել ՌԴ նախագահ Վլադիմիր Պուտինի հետ՝ ռուսական դիզելային վառելիքը ԱՄՆ մատակարարելու շուրջ։ Զելենսկին դա որակել է որպես ներդրում պատերազմի մեջ։