Օվերչուկի այցի շրջանակներում Երևանում քննարկվել են ԵԱՏՄ և ԵՄ տեխնիկական կանոնակարգերի անհամատեղելիության հարցերը
2 րոպեի ընթերցում
Երևանում Ռուսաստանի փոխվարչապետ Ալեքսեյ Օվերչուկի հանդիպումների արդյունքում պարզվել են Եվրասիական և Եվրոպական միության տեխնիկական կանոնակարգերի անհամատեղելիության որոշ նրբություններ:
«Արմենպրես»-ի փոխանցմամբ՝ օգոստոսի 29-ին կայացած ամենշաբաթյա ճեպազրույցի ժամանակ այս մասին հայտնել է Ռուսաստանի ԱԳՆ պաշտոնական ներկայացուցիչ Մարիա Զախարովան:
Զախարովայի խոսքով՝ հանդիպումները տեղի են ունեցել պրոֆեսիոնալ, անկեղծ և կառուցողական մթնոլորտում, քննարկվել են երկկողմ և ԵԱՏՄ ձևաչափով տնտեսական համագործակցության բազմաթիվ հարցեր, այդ թվում՝ որոշ տեսակի ապրանքների, հատկապես սննդամթերքի մատակարարման հետ կապված հարցեր:
Կողմերը պայմանավորվել են շարունակել քայլերը երկկողմ հարթակներում և ԵԱՏՄ-ի շրջանակներում:
«Հայաստանը հետաքրքրված է Եվրասիական ինտեգրացիոն մեխանիզմների ներդաշնակ գործունեությամբ, իսկ հայ արտադրողները գնահատում են ԵԱՏՄ անդամակցությունից ստացած գործնական արդյունքները, այդ թվում՝ ապրանքների առանց խոչընդոտ արտահանումը դեպի անդամ պետություններ»,-ընդգծել է Զախարովան՝ հիշեցնելով, որ վերջին տասը տարում Հայաստանի առևտրի շրջանառությունը ԵԱՏՄ երկրների հետ աճել է մոտ 10 անգամ:
Ռուսաստանի փոխվարչապետ Ալեքսեյ Օվերչուկը Հայաստան էր ժամանել օգոստոսի 20-ին։ Այցի շրջանակներում Օվերչուկը հանդիպել էր ՀՀ վարչապետ Նիկոլ Փաշինյանի հետ։