368.54
Գերմանիան կմասնակցի Ուկրաինային անվտանգության երաշխիքների տրամադրմանը. փոխկանցլեր
1 րոպեի ընթերցում
Բեռլինը կմասնակցի Ուկրաինային անվտանգության երաշխիքների տրամադրմանը եվրոպական գործընկերների հետ միասին: Ինչպես «Արմենպրես»-ը տեղեկանում է Reuters-ից, այս մասին հայտարարել է Գերմանիայի փոխկանցլեր, ֆինանսների նախարար Լարս Քլինգբայլը Կիև կատարած այցի ժամանակ:
«Կարևորն այն է, որ արդյունքում լինեն անվտանգության երաշխիքներ, որոնք կապահովեն, որ Ուկրաինան այլևս հարձակման չենթարկվի, և որ (ՌԴ նախագահ) Պուտինն այլևս չհամարձակվի հարձակվել Ուկրաինայի վրա», - ասել է Քլինգբայլը Կիև կատարած իր առաջին այցի ժամանակ:
Դրան հասնելու համար, ըստ փոխկանցլերի, ուկրաինական բանակը պետք է ուժեղանա, իսկ Ուկրաինայում զենքի արտադրությունն՝ ընդլայնվի:
Քլինգբայլը հայտարարել է, որ Գերմանիան «պատասխանատվություն կստանձնի» անվտանգության երաշխիքներ տրամադրելու գործում: Նա միևնույն ժամանակ շեշտել է, որ բանակցային ցանկացած գործընթաց պետք է սկսվի հրադադարից:
«Գնդակն այժմ նախագահ Պուտինի դաշտում է: Կարծում եմ՝ մենք դեռ երկար ճանապարհ ունենք անցնելու», - ասել է նա՝ հավելելով, որ իր կարծիքով՝ Վլադիմիր Պուտինն իր դիրքորոշումը չի փոխում և չի ներգրավվում իրական, լուրջ բանակցություններում:
Բաժանորդագրվեք մեր ալիքին Telegram-ում